Саҕалааһын мөлтөһүөр

Азия көҥүл тустууга чемпионатын бастакы күнүгэр бүгүн – 57, 65, 70, 79, 97 кг ыйааһыннаахтар күрэхтэһиини саҕалаатылар.

Биһиэннэриттэн көбүөргэ бастакынан Айаал Белолюбскай (57 кг) таҕыста. Утарсааччыта – Кум Хек Ким (КНДР). Биһиги бөҕөспүт киһитин атаҕыттан ылан умса көтөн 2 баалы урут ылбыта. Итинэн бастакы түһүмэх бүппүтэ. Онтон иккискэ киирэн атахтаан баран, утары атахтатан ахсааны тэҥнэтэн кэбистэ (2:2). Тута киһитэ «кириэстии» сатаата да, уолбут үчүгэйдик көмүскэннэ. Салгыы тустууга Ким атахха киирэн суулларан, эбии 2 баалы сурунна уонна кыайыыны ситистэ.

Манна, туораттан көрдөххө, Айаал кыайыыга баҕата наһаа улахан этэ. Наһаа ыксыыр. Ол иһин сыыһа-халты туттан кэбистэ дии саныыбын.

Хотугу кореец салгыы күрэхтэһиигэ монгол Занданбуд Занабазары 5:0 кыайан баран, финалга тахсар иһин хапсыһыыга индус Удитка 3:4 ахсаанынан хотторон кэбистэ. Онон Айаал тустан бүттэ.

Бүгүҥҥү күҥҥэ иккис киһибит Андрей Аронов (97 кг) сэрэбиэй быһыытынан маҥнай аан дойду чемпиона Ризабек Айтмухаҥҥа (Казахстан) 0:6 хоттордо. Киһитэ финалга тахсыбытын быһыытынан, Аронов «уоскутар» бөлөххө узбек Вейсаловы 6:0 ахсаанынан хотон, чемпионат боруонса мэтээлин иһин индус Викины кытта көрүстэ. Итиэннэ, хомойуох иһин күттүөннээх утарсыыны оҥорбото, 1:10 ахсаанынан хоттордо.

PS: уолаттарбыт тустууларын видеотын “Дьулурҕан” хаһыат Телеграмҥа таһаарыытыгар t.me/dzulurgan көрүҥ.

Бу күн арай, саха тустуутугар үөрүүлээх түгэнинэн, кыайыылаахтары наҕараадалааһыҥҥа Саха Республикатын физическэй култуураҕа уонна спорка министрэ Леонид Спиридонов кыттыыта буолла. Кини 79 кг ыйааһыннаахтарга наҕараада туттарда.

Аны сарсын опыттаах бөҕөстөрбүт Виктор Рассадин (74 кг) уонна Айаал Лазарев (125 кг) көбүөргэ тахсыахтара. Кинилэргэ эрэнэбит уонна ситиһиини баҕарабыт!

Петр ПАВЛОВ.