Николай Николаевич Тарскай төрөөбүт күнүн көрсө…

Ыам ыйын 8 күнүгэр Саха сирин биллиилээх государственнай уонна общественнай деятелэ, ССРС физическэй култуураҕа туйгуна Николай Николаевич Тарскай төрөөбүтэ 100 сылын туолар. Манан сибээстээн СР Правительствотын председателин солбуйааччы С.В. Местников салайааччылаах республикатааҕы хамыыһыйа тэриллэн, былааннаах үлэ ыытыллар.  

Бу, биһиги республикабытыгар бэлиэ түгэн. Олорон кэлбит историябытын, чаҕылхай дьоммутун умнуо суохтаахпыт. Холобур, Н.Н. Тарскай олоҕун бэлиэ тугэнинэн туһанан, республикаҕа физическэй култуураны уонна спорду ыччаттар ортолоругар өссө күүскэ тарҕатар, сайыннарар сыал-сорук турар.

2024 сылга үктэнээт, Н.Н. Тарскайга аналлаах тэрээһиннэр ыытыллан киирэн барбыттара уонна сыл устата ыытыллаллара былааннанар. Ол курдук, тохсунньу саҥатыгар Бороҕоҥҥо Н.Н. Тарскай аатынан Саха Республикатын көҥүл тустууга биирдиилээн уонна хамаанданан бастыыр иһин чемпионата, кини төрөөбүт улууһугар Уус Алдаҥҥа, Бороҕоҥҥо, саҥа үлэҕэ киллэриллибит спортивнай комплекска үрдүк тэрээһиннээхтик ыытыллыбыта.

Ити курдук, СР физическэй култуураҕа уонна спорка министиэристибэтин, СР физическэй култуураҕа уонна маассабай спорка управлениетын, Уус Алдан улууһун дьаһалтатын көҕүлээһиннэринэн үүммүт сылга тэриллэр улахан таһымнаах республикатааҕы уонна улуустааҕы күрэхтэһиилэр бары, Н.Н. Тарскай төрөөбүтэ 100 сылыгар ананан ыытыллаллар.

Күрэхтэһиилэри тэҥэ атын тэрээһиннэр эмиэ буолаллар. Ол курдук, Николай Николаевич Тарскай төрөөбүт нэһилиэгэр Баатаҕайга үөрэнээччилэргэ анаан научнай-практическай конфренция ыытыллыбыта. Биллиилээх киһи үбүлүөйүн көрсө кини туһунан кинигэ тахсар. Итини таһынан Баатаҕайга уонна Бороҕоҥҥо баар спортивнай тутууларга, Н.Н. Тарскай аатынан музейга, уулуссаҕа өрөмүөннүүр уонна саҥардан биэрэр үлэлэр ыытыллаллар.

Ыам ыйын 8 күнүгэр Бороҕоҥҥо, саҥа тутуллан үлэҕэ киллэриллибит спорт уораҕайын иннигэр Н.Н. Тарскай пааматынньыгын туруоруу сиэрэ-туома ыытыллара уонна бэс ыйыгар Баатаҕайга үбүлүөйгэ аналлаах улуустааҕы ыһыах ыһыллара былааннанар.

СР физическэй култуураҕа уонна маассабай спорка управлениетын начальнига Роман Иванович Оконешников салалтатынан, үбүлүөйдээх тэрээһини бэлэмнээһин уонна тэрийэн ыытыы боппуруостарыгар сүбэ мунньах буолла. Мунньахха, Ил Түмэн депутата Г.А. Васильев, спорт бэтэрээннэрин сэбиэтин председателэ Г.Г. Сивцев, 90-с сылларга Саха сирин спордун салайбыт В.П. Ноговицын, республикатааҕы спортивнай музей салайааччыта М.Е. Друзьянов, Уус Алдан түмсүүтүн салайааччы Е.Е. Неустроев, спорт уонна бэчээт үлэһиттэрэ кытыннылар.

Кэпсэтии сүрүннээн ыам ыйын 8 күнүгэр – Николай Николаевич Тарскай төрөөбүт күнүгэр Дьокуускай куоракка туох тэрээһиннэри ыытыы туһунан буолла. Итиэннэ сөбүлэһии быһыытынан, ити күнү быһа киин куоракка үбүлүөдээх кэрэ бэлиэ тэрээһиннэри ыытарга кэпсэттилэр. Ол курдук, «Туймаада» стадион таһыгар баар бюһун иннигэр үөрүүлээх миитинтэн саҕалаан, «төгүрүк остуолу», спорт көрүҥнэригэр табаарыстыы көрсүһүүлэри, быыстапканы, республикатааҕы араадьыйаҕа уонна «күөх экраҥҥа» анал биэриилэри, спорт бэтэрээннэриттэн видео ахтыылары, ыам ыйын 9 күнүгэр – үбүлүөйгэ аналлаах чэпчэки атлетикаҕа эстафетаны тэрийэн ыытыахха диэн этиилэр киирдилэр.

Ити курдук, Саха сирин спордун аҕатынынан билиниллибит чаҕылхай киһибит 100 сыллаах үбүлүөйүн киэҥ далааһыннаахтык бэлэмнээн уонна тэрийэн ыытар сорук турар.

Ким да умнуллубат! Туох да умнуллубат!

Петр ПАВЛОВ.