Стёпа “Азия оҕолоро” оонньууга кыттыаҕа

Биһиги оскуолабытыгар араас дьоҕурдаах, үөрэххэ, спорка, ырыаҕа-үҥкүүгэ ситиһиилээх оҕолор элбэхтэр. Кинилэртэн биирдэстэринэн Степа Попов буолар.

-Стёпа, бэйэҥ тускунан кылгастык билиһиннэриэҥ дуо?

-Мин 2009 сыллаахха төрөөбүтүм. Владимир Петрович Ларионов аатынан оскуолаҕа 8 “Б” кылааска үөрэнэбин.

-Успуордунан хаһааҥҥыттан дьарыктанан саҕалаабыккыный?

-Маҥнайгы кылаастан саҕалаан тустуунан дьарыктаммытым, онтон бу күһүҥҥэттэн мас тардыһыынан дьарыктанан саҕалаабытым. Тренерим Александр Герасимов.

-Тоҕо мас тардыһыы көрүҥүн таллыҥ?

-Миэхэ барсар көрүҥ дии санаабытым.

-Дьарыккын төһө сөбүлээтиҥ? Эйиэхэ мас тардыһыы тугу биэрдэй?

-Күүс-уох өттүнэн эбиллинним, курэхтээһиилэргэ сылдьан элбэх табаарыстанным, өй-саана өттүнэн сайынным дии саныыбын.

-Мас тардыһыыга сылдьан тугу ситистиҥ?

-Бастаан Республиканскай турнирга үһүс бочуоттаах миэстэни ылбытым. Онтон “Азия оҕолоро” норуоттар икки ардыларынааҕы курэхтэһиигэ сүүмэрдээһиҥҥэ 4-с миэстэ буолан, финальнай отборга киирэр быраабы ылбытым. Саамай улахан ситиһиим, финальнай отборга бастакы миэстэни ылан, Саха сирин сүүмэрдэммит хамаандатыгар киирэн, аны сайын ыытыллар “Азия оҕолоругар” кыттар быраабы ыллым.

–“Азия оҕолоругар” хайдах бэлэмнэнэн эрэҕиний?

-Муус устар 16-21 куннэригэр Казахстан хамаандатын кытта матчевай көрсүһүүгэ кыттыыны ыла барабын. Онтон ыам ыйын 15-27 куннэригэр Монголияҕа дьарыктана барыахтаахпыт.

Стёпаҕа улахан ситиһиини баҕарабыт!

Анжела БУРНАШЕВА, 9 «г» кылаас үөрэнээччитэ, “МЭҤЭБИЛ” пресс-киин корреспондена.