Дартска республика чемпионатыгар

Муус устарт 6-7 күннэригэр Хотун Тѳҥүлүгэ дартска Саха Республикатын чемпионата ыытылынна. Бу күрэхтэһии кэккэ биричиинэлэринэн ыытыллар миэстэтэ быһаарыллыбакка турбута. Маннык чемпионаты Дьокуускайга, эбэтэр улуустар кииннэригэр ыытааччылар. Икки күн Г.Десяткин аатынан спорткомплекска уонна Тѳҥүлү алын сүһүѳх оскуолатын саалатыгар 80-тан тахса спортсмен илин-кэлин түһүстэ.

Биирдиилээн күрэххэ эр дьоҥҥо 58 күрэхтэһээччи 3-4 киһилээх группаҕа арахсан оонньууну саҕалаабыттара. Кыайыылааҕынан аан бастакытын Нам улууһуттан Сергей Иванов таҕыста. Иккиһи Ивановка 3:4 ахсаанынан хотторбут Дьокуускай куораттан Михаил Мордовской ылла. Үһүс миэстэни Сунтаартан Евгений Иванов уонна Намтан Сергей Румянцев хааччыннылар. Манна Тѳҥүлүттэн Леонид Баишев күүстээхтэри туораталаан, 5-с миэстэҕэ тахсан үгүстэри соһутта.

Дьахалларга 33 күрэхтэһээччи баара. Маннык улахан күрэххэ аан бастакытын кыттыбыт Надежда Афонская эмиэ бэһис буолла, мэтээлгэ биир хардыы тиийбэтэ. Чемпион аатын күүтүллүбүтүн курдук, спорт маастарыгар кандидат Намтан сылдьар Мария Сивцева ылла. Иккис эмиэ Нам бэрэстэбиитэлэ Тамара Афанасьева, үһүс миэстэҕэ  Майаттан Наталья Иванова уонна Дьокуускайтан Айталы Сивцева ылан үѳрдүлэр-кѳттүлэр.

Микст (2 эр киһи уонна 1 кэрэ аҥар) диэн кѳрүҥҥэ 24 хамаанда 601 очко диэҥҥэ ким бастыырын быһаарыстылар. Уһун унньуктаах оонньууга Дьокуускайтан Семен Замятин, Елена Эллясина уонна Михаил Мордовской кимиэхэ да ииннилэрин биэрбэтилэр. Кинилэргэ 1:3 ахсаанынан хотторбут ыраах Сунтаар улууһуттан кэлбит Николай Попов, Анатолий Егоров уонна Галина Заровняева холбоһуктаах хамаандалара үрүҥ кѳмүс мэтээли кэттэ. Онтон боруонса хаһаайыннарынан буоллулар: Намтан Станислав Черкашин, Сивцева Мария, Дьяконов Андрей уонна Захаров Андрей (Бүлүү), Илгын Мэхээлэ (Чурапчы), Александра Морозова (Мэҥэ-Хаҥалас). Бу кѳрүҥҥэ соһуччу Тѳҥүлүттэн Леонид Баишев, Владлен Кисиляхов уонна Варвара Попова элбэх күүстээх хамаандалары туоратан үчүгэй ѳйдѳбүлү хааллардылар.

Иккис күҥҥэ иккилии киһилээх хамаандалар Республика чемпионун аатын былдьастылар. Эр дьоҥҥо түмүк маннык буолла: 1 миэстэ – Юрий Эверстов, Сергей Иванов (намнар), 2 миэстэ – Семен Замятин, Михаил Мордовской (дьокуускайдар), 3 миэстэни үллэһиннилэр – Намтан Семен Тимофеев, Егор Бурнашев уонна Дьокуускайтан Макар Яковлев, Петр Макаров. Тѳҥүлүттэн Иван Баишев уонна Василий Эверстов 23 хамаандаттан соһуччу 5-с миэстэни ылан үчүгэй кѳрдѳрүүлэннилэр.

Дьахталларга намнар күннээтилэр. 1 миэстэ – Татьяна Замятина, Мария Сивцева, 2 миэстэ – Пелагея Эверстова, Тамара Афанасьева, 3 миэстэ – Елена Никитина, Екатерина Флегонтова (бары намнар) уонна Майаттан Наталья Иванова, Ольга Назарова. 12 хамаандаттан Тѳҥүлүттэн Надежда Афонская уонна Одьулуунтан Саргылаана Павлова хамаандалара 5-с миэстэ буолла.

Тѳҥүлүгэ дартс кѳрүҥү оонньообуппут биир сыл буолла. Бу кѳрүҥ Саха сиригэр сайдыбыта 13-с сылыгар барда. Намнар, майалар оонньообуттара 8-9 сыл буолбут. Онон саҥа оонньоон эрэр дьоҥҥо кѳрдѳрүү куһаҕана суох.

Бу улахан тэрээһини ыытарбытыгар ѳйѳбүл, кѳмѳ буолбут Тѳҥүлү олохтоох дьаһалтатыгар (аҕа баһылык Эверстов Петр Васильевичка), спорткомплекс үлэһиттэригэр (Куприянова А.И.), оскуола дириэктэригэр Сотников В.Е., Цыпандин Г.В., дартс кулууп чилиэннэригэр махталбытын тиэрдэбит.

Василий ЭВЕРСТОВ.