Валерий Андросов чемпионнаата

Москватааҕы педагогическай государственнай университет спорка саалатыгар спортивнай тустууга студеннар Бүтүн Россиятааҕы национальнай лигаларын иккис күрэхтэһиитэ буолан ааста.

Күрэхтэһии гректии-римнии, көҥүл тустуу уонна дьахталлар тустууларыгар ыытылынна. Түмүккэ мэтээлгэ – дойду 25 үрдүк үөрэххэ кыһатын спортсменнара тигистилэр. Көбүөргэ барыта 178 спортсмен тахсан күөн көрүстэ.

Онуоха көҥүл тустууга М.К. Аммосов аатынан Хотугулуу Илиҥҥи федеральнай университеттан Валерий Андросов 57 киилэҕэ тэҥнээҕин булбакка, бастакы миэстэҕэ эрэллээхтик таҕыста. Санатан эттэххэ, Валерий – РФ уонна СР үтүөлээх тренерэ Иван Николаевич Сивцев салалтатынан дьарыктанар. Уолаттарга Россия күрэхтэһиитин кыайыылааҕынан, аан дойду түһүлгэтин боруонса призерунан буола сылдьыбыта.

Бу туһунан биһиэхэ Хотугулуу Илиҥҥи федеральнай университет ыччат дьону эт-хаан өртүнэн иитиигэ уонна студеннар спортарын сайыннарыыга киинин салайааччыта, Саха сиринээҕи студеннар спортивнай союзтарын бэрэссэдээтэлэ Александр Черкашин иһитиннэрдэ.

“Дьулурҕан”.