Дьон-сэргэ тапталын, дириҥ ытыктабылын дьиҥ-чахчы ылбыт салайааччы

Бүтүн Сахабыт сирэ бүгүн ыар сүтүктэннэ. Биһиги норуоппут сүдү киһитэ, Саха Өрөспүүбүлүкэтин бастакы Президенэ, ытыктабыллаах Михаил Ефимович Николаев бу олохтон туораата.

Михаил Ефимович олоҕун тиһэх күнүгэр диэри норуотун интэриэһинэн олорбута. Дьон-сэргэ тапталын, дириҥ ытыктабылын дьиҥ-чахчы ылбыт салайааччы кини буолар.

Саха Өрөспүүбүлүкэтин судаарыстыбаннаһын саҥа саҕахтарын арыйбыт, аныгы үйэҕэ сирдээн киллэрбит, бигэ тирэхтээх буоларбытыгар олук уурбут, барыбытын түмпүт уһулуччулаах бас-көс киһибитигэр норуот өрүү махталлаах буолуоҕа.

Кини дириҥ толкуйа, мындыр сүбэтэ, ырааҕы өтө көрүүтэ миэхэ өрүү күүс-көмө, өйөбүл буолара уонна олоҕум тухары инникигэ сирдиэҕэ.

Ытыктабыллаах Михаил Ефимович дьиэ кэргэнигэр, чугас дьонугар дириҥ кутурҕаммын тиэрдэбин. Саха сирэ бүттүүнэ эһигини кытта ыар сүтүгү тэҥҥэ үллэстэр.

Улуу киһибит туһунан сырдык, үтүө өйдөбүл биһиги өйбүтүгэр-сүрэхпитигэр мэлдьи баар буолуо, кини оҥорбута, саҕалаабыта үйэлэргэ салҕаныа.

Саха сирэ баарын тухары, Михаил Ефимович туһунан сырдык өйдөбүл куруук баар буолуо.

Саха Республикатын Ил Дархана Айсен НИКОЛАЕВ.

Александр Назаров хаартыскаҕа түһэриилэрэ.