Үс туур иннинэ турук хайдаҕый?

Дуобат-саахымат республикатааҕы киинигэр нуучча дуобатыгар Саха сирин 2023 сыллааҕы үрдүкү лигатын чемпионата өссө бэс ыйын 30 күнүттэн саҕаланан ыытылла турар.

Дьахталларга Айыына Прокопьева, Юлия Никанорова, Сандаара Апросимова, Саяника Кондратьева, Алена Большакова (Дьокуускай), Дайаана Габышева, Альбина Большакова, Сайыына Попова (Нам), Тунаара Федорова, Дайаана Алексеева (Горнай), Матрена Ноговицына, Амелия Местникова (Чурапчы), Дайаана Кондратьева (Үөһээ Бүлүү), Анна Шишигина (Мэҥэ Хаҥалас) сүүмэрдэнэн киирэн оонньууллар.

Отто эр дьоҥҥо Алексей Большаков, Артем Федоров, Николай Стручков (Дьокуускай), Николай Гуляев, Иван Щукин (Таатта), Гаврил Колесов (Чурапчы), Айсен Егоров (Хаҥалас), Афанасий Филиппов (Үөһээ Бүлүү), Андрей Федотов (Амма), Арсен Михайлов (Горнай), Иван Токусаров, Прокопий Говоров (Мэҥэ Хаҥалас) кытталлар.

Көрбүккүт курдук, республикабыт бу күҥҥэ күүстээх дуобатчыттара бары кэлэн күөн көрсө сылдьаллар.

Манна даҕатан эттэххэ, билиҥҥи кэмҥэ биир тумус туттар спортсмеммыт – международнай гроссмейстер Матрена Ноговицына Дуобат-саахымат киинин дириэктэринэн анаммытын иһитиннэрэбит. Бу иннинэ киини салайан олорбут Иван Токусаровы – республикатааҕы физическэй култуура уонна маассабай спорт управлениетын начаалынньыгын солбуйааччынан ыҥыран үлэлэтэ сылдьаллар.

Чемпионат от ыйын 6 күнүгэр түмүктэнэр. Бүгүн дьахталларга 9-с, 10, оттон эр дьоҥҥо 7-с, 8-с туурдар оонньоннулар. Онуоха билиҥҥитэ дьахталларга Алена Большакова, Тунаара Федорова, эр дьоҥҥо Николай Стручков, Гаврил Колесов балаһыанньалара үчүгэй курдук. Аны дьахталларга уонна эр дьоҥҥо үстүү оонньуу хаалла.

Кылаабынай судьуйанан Бүтүн Россиятааҕы спортивнай категориялаах судьуйа Гаврил Винокуров үлэлиир.

PS: Чемпионат хаамыытын манна быһа көрүөххүтүн сөп: https://ufkims14.ru/deyatelnost/onlajn/1996-chempionat-respubliki-sakha-yakutiya-po-zhimu-i-tyage-stanovoj

Петр Павлов.

Иван Павлов хаартыскаҕа түһэриилэрэ.