Сонуннар

«Сулус буолан умайдын» триптих

Композиция уҥа өттө, Роман төрөөбүт дойдута, ол эбэтэр, Эдьигээҥҥэ хоту сирэ, Сахатын сирэ былыргыта ойууланан көстөр бэлиэ. Өбүгэбитин умнумуох, куруутун утумнуу, илдьэ, харыстыы сылдьыахха диэн үөрэтэр.

Онтон хаҥас өттө, Роман төрөөбүт төрүт Эдьигээнин көрдөрөр. Эдьигээн картанан территорията уонна Эдьигээн олоохтоох Аҕа уустарын төрүт кыыллара-көтөрдөрө көстөллөр.

Сүрүн, ортоку оҥоһукка Роман тус бэйэтин үс кута ойууламмыт диэххэ сөп. Алларааттан саҕалаан дьоннор, табалар, Роман борустуой, хотугу норуоттан силис тардынан үүнэн сайдан, олимпийскай чыпчаалга тиийбитэ көстөр (олимпийскай факел).

Онтон дьэ, биһиги Ромаммыт Олимпиадаҕа тиийэн уот курдук суостаахтык дьиҥ кыаҕын биллэрбитэ, иранец Джавадины кытта туста, хапсыһа сылдьара көстөр. Уот оройугар үс сүрүн уот кыымнара Олимпиада 3 миэстэтэ. Ортоку, үчүгэйдик сыныйан көрдөххө, Роман Михайлович Олимпиада үрдүк чыпчаалын ылбыт күнүгэр 1-кы миэстэҕэ туран илиитин өрө ууммута ойууланар. Уонна дьэ, билигин дьонугар-сэргэтигэр, Сахатын сиригэр Роман Михайлович Дмитриев Үөһээ халлаантан Сүдү кыыл Хотой буолан, Сахатын сирин араҥаччылыыр, харыстыыр сүдү киһибит!

Ону таһынан, Хотойбут кынаттара туспа ис хоһоонноохтор. Ол курдук, хаҥас өттүгэр кинини арыаллыыллар, күүс-көмө, араҥаччы буолаллар – кини Өбүгэлэрэ, төрүттэрэ, дьоно-сэргэтэ, кэргэнэ-оҕолоро, доҕотторо.

Онтон уҥа өттүгэр, кинини кынаттыыллар – кини өйө-санаата, күүһэ-уоҕа, мындыр толкуйа, муудараһа…

Бу композицияны быйыл Р.М. Дмитриев 75 сыллаах юбилейыгар төрүт диэн анаан-минээн, сыал-сорук турурорунан туран, Эдьигээн эбэҥки национальнай оройуон эдэр кэскиллээх, культура эйгэтигэр үлэлии-хамсыы сылдьар биһиги кыргыттарбыт: музей үлэһитэ Екатерина Никифорова уонна оҕо искусствотын оскуолатын преподавателэ Наталья Вензель айан оҥордулар.

PS: триптих – грек тылыттан тахсыбыт, үс оҥоһуктан турар искусство көстүүтэ диэн өйдөбүллээх.

Айал СОФРОНОВ, Эдьигээннээҕи история музейын сотруднига.

Петр ПАВЛОВ хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *

199543
Бүгүн : 459