Бэйэтин үбүлүөйүгэр бэлэх оҥоһунна

Россия Суруналыыстарын сойууһун чилиэнэ, Саха Республикатын култууратын үтүөлээх үлэһитэ, бэчээт туйгуна Николай Николаевич Ребров төгүрүк сааһын туоларыгар – олоҕун кэрэ-бэлиэ түгэннэригэр сөп түбэһиннэрэн, бэйэтэ-бэйэтигэр уонна саамай күндү, чугас дьонугар айар үлэтинэн бэлэх оҥорор, олору аймахтарыгар, доҕотторугар бэлэхтиир үтүө үгэстээх.

Ол сиэринэн соторутааҕыта, үбүлүөйдээх сааһын көрсө «Хоһооннорум – хоболорум» диэн хомуурунньугун Ю.А. Гагарин аатынан республикатааҕы типографияҕа бэчээттэтэн таһааран, доҕотторугар утары уунна.

Николай Николаевич – үтүө киһи. Кинилиин «Саха сирэ» сирэ хаһыакка спорду сырдатыыга бииргэ үлэлээбиппит. Онно Николай Николаевич спорду ис иһиттэн үчүгэйдик билэринэн, ханнык эмэ мөккүөрдээх түгэннэргэ иккиэн санаабыт биир буоларынан сөхтөрөрө. Элбэҕи аахпыт-билбит, спорт эйгэтигэр үгүс доҕоттордоох-атастардаах буолан – спорт историятын, урукку биллиилээх спортсменнары, тренердэри эндэппэккэ билэр. Кини суруйуулара куруук сиэрдээх, олохтоох, киһи ылынымтыа буолааччылар.

Тустууну сэҥээрээччилэр бука билэр буолуохтааххыт, суруналыыс Николай Ребров суруйан таһаарбыт «Хотугу холорук» диэн ССРС чемпиона, норуоттар икки ардыларынааҕы кылаастаах спорт маастара Николай Неустроев (2005), «Тустууга анаммыт олох» диэн Саха АССР уонна РСФСР үтүөлээх тренерэ Николай Николаевич Волков, «Кырдьыгы суолдьут оҥостон» диэн норуоттар икки ардыларынааҕы категориялаах судьуйа Алексей Егорович Мостахов, «Учууталга махтал» диэн физкултуура учуутала Василий Никитич Макаров тустарынан бэртээхэй кинигэлэрин. Бу үлэлэрин барытын эҕэрдэ суруктаан миэхэ бэлэхтээбитин кичэллээхтик уура сылдьабын, кэмиттэн-кэмигэр ылан хаттаан ааҕыталыыбын. Этэргэ дылы, спорт, тустуу куттаах киһиэхэ – күндү бэлэхтэр.

Кэнники, хоһооннорун кинигэтигэр даҕаны Н.Н. Ребров таптыыр спордун, тустуутун тумнубатах. Ол курдук, быраатын курдук истиҥник саныыр доҕоро, сахалыы ыстаныыларга спорт маастара, биллиилээх суруналыыс Василий Федорович Посельскайга, үтүөлээх тренер Николай Николаевич Волковка, улуу тустуук Роман Михайлович Дмитриевкэ сахалыы хомоҕой тылынан хоһоон айан, ытыктыыр дьонун аны суруйуу атын көрүҥүнэн айан үйэтиттэ.

Манна даҕатан эттэххэ, Николай Ребров барыта 37 кинигэни, 5 буклеты суруйан, оҥорон, бэлэмнээн таһаарда. Кини суруйар тиэмэтэ киэҥ: норуот хаһаайыстыбата, политика, история, идеология, үөрэхтээһин, физкултуура уонна спорт, доруобуйа харыстабыла, биллиилээх дьон олохторо о.д.а. сүүһүнэн суруйуулардаах республика биир биһирэнэр ааптара. Республика уонна оройуон хаһыаттарыгар 1970 сылтан суруйар.

Араас сылларга Абый, Үөһээ Дьааҥы оройуоннарыгар комсомолга, спорка, үөрэхтээһин салаатыгар, советскай-хаһаайыстыбаннай тэрилтэлэргэ, саҥа кэмҥэ Абыйга улуус дьаһалтатыгар, Дьокуускайга бэчээккэ, сонуннары тарҕатар эйгэҕэ үлэлээбит, билигин бочуоттаах сынньалаҥҥа олорор Николай Николаевич Ребров бу дьыл ахсынньы 27 күнүгэр лоп курдук 75 сааһын туолар. Бу кэрэ бэлиэ түгэнинэн ытыктыыр киһибитин, аҕа саастаах доҕорбутун ис сүрэхтэн итиитик-истиҥник эҕэрдэлиибит! Баҕарабыт дьиэ-кэргэҥҥэр нус-хас олоҕу, саха алмааһыныы кытаанах доруобуйаны, баҕа санаан, туруоруммут былааннарын-соруктарын туолалларыгар, олоххо киирэллэригэр! Өссө да чугас дьоҥҥун, доҕотторгун үөрдэ-көтүтэ айа-тута сылдьаргар!

Петр Павлов, «Дьулурҕан» хаһыат редактора.