Ил Дархан Кубога: Кимнээх бастакы үс миэстэни ылыахтарай?

Дьокуускай. Бүгүн, Ил Дархан саахымакка Кубогын ахсыс туура оонньонно. Тууртан туур ахсын күүстээхтэр сиидэлэнэн, бириистээх миэстэҕэ кимнээх тиксэллэрин быһаарар тыҥааһыннаах оонньуулар дьэ саҕаланнылар.

Бүтэһик иннинээҕи туур түмүктэрин билиһиннэрдэххэ, турнир күүстээхтэрэ, международнай гроссмейстердэр бэйэлэрин икки ардыларыгар оонньуулара, хайдах эрэ эрдэттэн сүбэлэспит курдук, эйэ дэмнээхтик түмүктэннилэр. Ол курдук, Кокарев – Гребнев, Придорожнай – Кряквин, Шомоев – Рычков тэҥнэстилэр. Ол оннугар Баира Кованова – Юрий Родионовы хотон балаһыанньатын тупсарда.

Биһиги маастарбыт, былырыыҥҥы маннык Кубокка сахалартан бастыҥ көрдөрүүлэммит Дмитрий Егоров – Альберт Постниковы кыайда. Биллиилээхтэртэн Галина Струтинская аны Олеся Моисееваҕа хотторон, ахсыс туур түмүгүнэн 3,5 эрэ очукуолаах.

Онон ахсыс туур кэнниттэн Дмитрий Кокарев (Свердловскай) 6,5 очукуолаах син биир баһылыыр-көһүлүүр балаһыанньалаах. Киниттэн очукуо аҥаарынан эрэ хаалан Антон Шомоев (Бурятия), Дмитрий Кряквин (Крым), Алексей Придорожнай (ХМАО-Югра), Алексей Гребнев (Самара), Баира Кованова (Саратов) уонна Дмитрий Егоров (Саха сирэ) саппай уопсан иһэллэр.

Онтон Олег Рычков (Хабаровскай) уонна Денис Назаров (Саха сирэ) – 5,5 очукуолаахтар.

Дьэ, ким хаһыс миэстэ буоларын бүтэһик, тохсус туур быһаарар. Барытын Придорожнай – Кокарев, Гребнев – Шомоев, Кряквин – Егоров, Рычков – Кованова сирэй көрсүүлэрэ хайдах түмүктэнэриттэн тутулуктаах буолуоҕа дии саныыбын.

Санатан эттэххэ, тохсус быһаарыылаах туур оонньуулара сарсын, тохсунньу 31 күнүгэр күнүс 14:00 чаастан саҕаланаллар. Онтон күрэхтэһиини үөрүүлээхтик түмүктээһин, кыайыылаахтары наҕараадалааһын киэһэ 19:00 чаастан буолуоҕа.

Дьэ, кытаанах, эрийсиилээх оонньуулар буолуохтара. Эһиги санааҕытыгар кимнээх бастакы үс миэстэни ылыахтарай?

Петр ПАВЛОВ.