Биллиилээх бөҕөс биир дойдулаахтарыгар көмөтө

Айаал Павлов – көҥүл тустууга ССРС, хапсаҕайга Саха Республикатын спортарын маастара, Саха Республикатын физическэй култуураҕа уонна спорка туйгуна, Үөһээ Бүлүү Үөдүгэй нэһилиэгин бочуоттаах гражданина.

Биллиилээх бөҕөс бэйэтин баҕа өртүнэн хаһыакка сурутуу үтүө хамсааһыныгар иккис сылын кыттар. Ол курдук, кини былырыын уонна быйыл дойдутугар – Үөһээ Бүлүү Куду учаастагын оскуолатыгар биһиги, «Забота-Арчы» хаһыаппытын суруттарда.

–Куду учаастагар эдэр сылдьан биһиги бастакы президеммит Михаил Ефимович Николаев управляющайынан үлэлии сылдьыбыт. Ити курдук, ССРС народнай учуутала Михаил Алексеев, республикатааҕы лицей дириэктэрэ Иван Шамаев, Ил Түмэн депутата Феодосия Габышева уо.д.а. биллиилээх дьон Кудуттан төрүттээхтэр. Дойдум суола оҥоһуллан, почтаны таһыы тубуста, – диэн астына кэпсиир Айаал Романович.

Учаастак оскуолатын библиотекатыгар дьон барыта кэлэн, хаһыаттары ааҕар эбит. «Забота-Арчы» хаһыаты суруттарбыт биир дойдулаахтарыгар А.Р. Павловка махталлара улахан.

Айаал Павлов билигин Манчаары аатынан спорт төрүт көрүҥнэригэр «Модун» спортивнай комплексыгар хапсаҕайга тренердиир итиэннэ дуогабар быһыытынан Чурапчытааҕы физическэй култуура уонна спорт институтугар үлэлиир.

Айаал Павлов: «Үүммүт 2023 сылга «Забота-Арчы» хаһыаты оҥорон таһаарааччыларга уонна ааҕааччыларга ситиһиилэри, кытаанах доруобуйаны баҕарабын! Оттон республика бары олохтоохторугар ааспыт сыллааҕы үлэҕэ, олоххо көрдөрүүлэри өссө тупсарарга ыҥырабын. Саха спорда сайда турарыгар!» – диэн бэйэтин эҕэрдэтин тиэрдэр.

Оттон биһиги, Айаал Романовичка махтанабыт уонна кини үтүө холобурун батыһан, атыттар даҕаны – сахалыы тылынан спорду сырдатар «Дьулурҕан» сыһыарыылаах, республика үрдүнэн тарҕанар «Забота-Арчы» хаһыакка суруттарыыны ыыталларыгар, тэрийэллэригэр баҕарабыт.

Петр Павлов.