Мэҥэлэр холобурдара батыһааччылаах буоллун!

Иллэрээ күн Аллараа Бэстээххэ Тимир Пинегин аатынан «Парус» спорткомплекска, хапсаҕайга Саха сирин бастакы муҥутуур кыайыылааҕа С.Ф. Слепцов – Баппаай кэриэһигэр Мэҥэ Хаҥалас улууһун биирдиилээн уонна хамаанданан бастыыр иһин чемпионата ыытыллан түмүктэннэ. Күрэхтэһиигэ улуус 19 нэһилиэгиттэн барыта 157 бөҕөс күөн көрүстэ. Хапсыһыылар эр дьоҥҥо уонна аҕам саастаахтарга араарыллан, икки бөлөҕүнэн ыытылыннылар.

Түһүлгэ муҥутуур кыайыылааҕынан Мэҥэ Хаҥалас улууһун Бүтэйдээх нэһилиэгэ (баһылык А.Н. Чичахов) туруорбут сүрүн бирииһин – убаһаны Чыамайыкыттан Станислав Дьячковскай ылары ситистэ.

Мэҥэлэр маладьыастар! Бу үтүө холобуру атын улуустар батыһаллара буоллар. Туһааннаах салайааччылар, специалистар санааларын уурдахтарына – Чурапчы, Уус Алдан, Амма, Нам, Таатта, Сунтаар, Ньурба, Томпо, Үөһээ Дьааҥы, Бүлүү, Үөһээ Бүлүү бэйэлэригэр маннык, ол эрээри көҥүл тустууга улахан дьоҥҥо күрэхтэһиилэри, эбэтэр аһаҕас түһүлгэлэри тэрийиэхтэрин сөп этэ дии саныыбын.

Туох да диэбит иһин, тустуубут сайдыытын систиэмэтэ ситэтэ суох. Холобур, улахан дьоҥҥо күрэхтэһиибит аҕыйах. Баар-суох республикабыт чемпионата – Н.Н. Тарскай кэриэһигэр Саха сирин көҥүл тустууга биирдиилээн уонна хамаанданан бастыыр иһин чемпионата аат эрэ харата ыытыллар буолла.

Дьиҥэ, ити чемпионаты билигин, сэтинньи-ахсынньы ыйдарга ыытар оруннаах этэ. Саҥа сылга саҥа хамаанданы талар инниттэн. Онно туох баар күүстээхтэр бары улуустарынан сүүмэрдэнэн кэлэн кыттан, бастыҥнар састаапка киирэн эппиэттээх күрэхтэһиилэргэ талыллан барыахтаахтара. Аны ол чемпионат түмүгүнэн аҕыс үчүгэй көрдөрүүлээх улуустар быһаарыллан, Кубок иһин хамаанданан сирэй көрсөр иһин күрэхтэһии тэрийэр буоллар. Ити курдук, саҥалыы сонуннук үлэлээтэххэ, инники диэки сыҕарыйыы син тахсыа этэ, кыайыылар даҕаны кэлиэхтэрэ этэ.

Аны, сыл устата ыытыллар күрэхтэһиилэри ырытан көрөн баран, хайаан даҕаны кыттыыны ылар күрэхтэһиилэр былааннаныахтаахтар. Ол түмүгүнэн сыана быһыллан, ырытыллыахтаахтар. Ол – Ярыгин турнира, Россия чемпионата, Россия Кубога. Онтон атын күрэхтэһиилэр ити түһүлгэлэргэ сүүмэрдээһин уонна бэлэмнэнии эрэ курдук көрүллүөхтээхтэр.

Бары билэ-көрө сылдьарбыт курдук, билигин саханы саха дэппит тустуубут балаһыанньата санаа хоту буолбатах. Бэйэтин дьаалытынан устан иһэр. Ол барыта салалтаттан, үүннээччиттэн-тэһииннээччиттэн тутулуктаах. Быһата, Саха сирин спорка министиэристибэтиттэн уонна Спортивнай тустууга федерациятыттан.

Петр ПАВЛОВ.