Кыайыылаах быһаарылынна

Сыл устата ыытыллыбыт нэһилиэктэр икки ардыларынааҕы комплекснай спартакиада түмүктэннэ. Улуус олохтоохторо спорт 23 көрүҥэр сүрүн бириис иһин көхтөөх кыттыыны ыллылар. Күрэхтэһиилэр сытыытык барбыттарыгар нэһилиэктэр баһылыктарын, спорт инструктордарын үлэлэрин бэлиэтиэҕи баҕарыллар.

Спорт маассабай көрүҥнэригэр хамаандалар мэлдьи толору кытталлара улууспутугар сөптөөх үлэ баран иһэрин бигэргэтэр. Горнайга төрүт буолбут буулдьанан, классическай, традиционнай оҕунан ытыылар олус күрэстээхтик, тыҥааһыннаахтык барбыттара кэскиллээҕин көрдөрөр. Спорт национальнай көрүҥнэрэ да туора турбаттар. Ордук ыччаттар хапсаҕай көрүҥэр улахан болҕомто уураллар. ГТО многоборьета сочуокка киирбитэ эмиэ ураты буолла.

Уопсай түмүккэ, бары көрүҥнэргэ көхтөөх кыттыыны Бэрдьигэстээх (инструктордар Саргылаана Федорова, Евгения Каленкова), Одуну (Ада Аянитова), үһүс Октябрьскай (Александр Жирков) хамаандалара пьедестал үктэллэрин үллэһиннилэр.

Кэнники сылларга спорт, нэһилиэнньэ чөл, доруобай олохтоох буоларыгар улахан болҕомтону уурар Кировскай (Светлана Леонтьева, Петр), Маалтааны (Айтал Алексеев) нэһилиэктэрэ биэс бастыҥ иһигэр киирдилэр. Нэһилиэктэр спорт инструктордара Мытаахтан Анна Тимофеева, Атамайтан Никон Ковров, Маҥаныттан Михаил Осипов, Солоҕонтон Рудольф Захаров, Валентин Дормидонтов үлэтин бэлиэтиэҕи баҕарыллар. Хамаанданы түмэн, күрэхтэһиини көтүппэккэ кытыннаран, дойдуларын чиэһин туһугар ураты үлэни ыыттылар.

Физическэй култуура уонна маассабай спорду сайыннарыы киинин дириэктиэрин э.т. Вячеслав Васильев, тустаах үлэһиттэр Николай Константинов, Авксентий Филиппов, Федор Винокуров, спорт көрүҥнэрин тренердэрэ күрэхтэһиилэр мөккүөрэ суох, сиэрдээхтик ыытыллалларыгар ураты болҕомтону уурбуттара хайҕаллаах суол.

Кэлэр 2024 с. спорт салалатата нэһилиэнньэ бары араҥатын хабар туһуттан, доруобуйаларынан хааччахтаах дьоҥҥо көрүллэр көрүҥнэри сочуокка киллэрэн, спорт көрүҥнэрин эбэн, улууспут спордун инники күөҥҥэ таһаарар баҕа санаалаахтар. Улуус олохтоохторун бары тэрээһиннэргэ көхтөөхтүк кытталларыгар ыҥыраллар.

Вячеслав АЛЕКСЕЕВ, Горнай улууһун “Үлэ күүһэ” хаһыат суруналыыһа.