Үрдүк таһымнаахтык ыытылынна

Ахсынньы ый 23-24 күннэригэр Нам улууһугар көҥүл тустууга ССРС спордун норуоттар икки ардыларынааҕы кылаастаах маастара; ССРС Сэбилэниилээх Күүстэрин үс төгүллээх чемпиона; Венгрияҕа, Болгарияҕа, Ираҥҥа буолбут норуоттар икки ардыларынааҕы турнирдар кыайыылаахтара; ССРС чемпионатын призера Иннокентий Николаевич Зырянов аатыгар ыытыллар турнир 25 төгүлүн, спортсмен 65 сааһыгар анаан буолан ааста.

Күрэхтэһиигэ 2009-2010 сыллаах төрүөх 261 оҕо республикабыт 14 улууһуттан кэлэн күөн көрүстэ. Тэрээһин сүрдээх үрдүк таһымҥа ааста. Бу турнирга кыайбыт, миэстэлэспит оҕолор республикабыт чиэһин көмүскүү Дальнай Восток чемпионатыгар Хабаровскай куоракка уонна Россия түһүлгэтигэр киирсэ барыахтара.

Үйэ чиэппэрин устата биир да сыл тохтообокко ыытыллан кэлбит турниры спортсмен бииргэ төрөөбүт быраата, спорт бэтэрээнэ Николай Зырянов дьиэ кэргэнинээн сүүрэн-көтөн, быһаччы тэрийсэн кэллэ. Ыччаты спорка көҕүлүүр, чөл олоххо угуйар ыраас холобур бу буолар. Быйылгы тэрээһиҥҥэ кинилэр улахан уоллара хапсаҕайдаһан уонна көҥүл тустууга Россия спордун маастара Макар Николаевич Зырянов салайар спортивнай таҥаһы тигэр “Айрон” хампаанньа сүрүн спонсорынан буолла. Ол курдук, кыайыылаахтарга, призердарга барыларыгар боруонса, үрүҥ, кыһыл көмүс мэтээллэр, кубоктар, Иннокентий Зырянов мөссүөннээх футболкалар туттарылыннылар.

Маны таһынан турнир тэриллиэҕиттэн сылын аайы күүс-көмө, өйөбүл буолбут, спонсордаспыт 15 киһиэхэ анал футболкалаах спортивнай көстүүмнэри кэтэттилэр. Күрэхтэһии түмүгүнэн оҕолорго бэртээхэй бириистэри спонсордаатылар: Чурапчы спортивнай оскуолатын коллектива, И.Н. Зырянов Үөдэй оскуолатыгар бииргэ үөрэммит табаарыстара, араас кэмҥэ алтыспыт доҕотторо, атастара, Үөдэй олохтоох администрацията, Иннокентий Зырянов бииргэ төрөөбүттэрэ, Николай Зырянов кэргэнин бииргэ төрөөбүттэрэ, Үөдэй уонна Хаарбалаах оскуолатыгар бииргэ үөрэммит табаарыстара.

Иннокентий Зырянов аатыгар турниры аан бастаан көҕүлээн тэрийбит Д.П. Коркин аатынан интернат-оскуолатыгар бииргэ үөрэммит оҕолоругар уонна онтон ыла сылын аайы күрэхтэһиини быспакка тэрийэр Намнааҕы оҕо спортивнай оскуолатын коллективтарыгар Зыряновтар дьиэ-кэргэттэрэ, бииргэ төрөөбүттэрэ истиҥ махталларын тиэрдэллэр. Кытаанах доруобуйаны, кыайыыга дьулууру, үрдүк ситиһиилэри баҕараллар. Үйэ аҥарын устата Иннокентий Зырянов турнирыттан уһуйуллубут, кынаттаммыт спортсменнар элбэхтэриттэн үөрэллэр, өссө да инники кэскиллээх ыччаттар тахсыахтара диэн эрэнэллэр

Людмила МАКАРОВА, Иннокентий Зырянов бииргэ төрөөбүт балта.