Дьокуускай 3 №-дээх спорка кыһата – 25 сылын туолла!

Алтынньы 2 күнүгэр В.П. Керемясов аатын сүгэр Дьокуускай куорат 3 №-дээх оҕо спортивнай оскуолата тэриллибитэ 25 сылын туолла. Билигин бу оскуола – Дьокуускайга, Саха сиригэр эрэ буолбакка, Россияҕа тиийэ бэйэтин үлэтинэн билиннэ диэтэхпитинэ сыыстарбаппыт буолуо. Бу оскуолаҕа элбэх чемпионнары, призердары иитэн-такайан таһаараллар.

Оччотооҕу Дьокуускай куорат дьаһалтатын уурааҕынан, 1998 сыллаахха алтынньы 2 күннээҕи  бирикээскэ “Об открытии детско-юношеской спортивной школы по вольной борьбе” диэн суруллубут. Баһылык И.Ф. Михальчук бирикээһинэн уонна дьаһалта дьыалаларын салайааччы Е.Н. Федоров илии баттааһыннаах. Онно олоҕуран оскуола аһыллыбыта. Бу иннинэ уһун соҕустук сындалҕаннаах үлэ барбыт. Тустууга аналлаах туспа оскуола баар буолуохтаах диэн. Онно улахан кэпсэтиһии, федерация көмөтө сүрдээх улахан эбит. Ол кэмҥэ Илья Михальчук бэйэтэ куорат тустууга федерациятын салайааччыта этэ. Онно барытыгар туруорсан, уонунан сылларга быраҕыллан турбут квартальнай котельнайы өрөмүөннээннэр, спортивнай оскуола оҥорбуттар.

Бу сыллар усталарыгар оскуола иитиллээччилэрэ – республика, Дальнай Восток, Россия күрэхтэһиилэригэр, “Азия оҕолоро” норуоттар икки ардыларынааҕы спортивнай оонньуутугар элбэх ситиһиилээхтэр.

2015 сыллахха Босния уонна Герцеговина – Сараево куоратыгар көҥүл тустууга кадеттарга аан дойду күрэхтэһиитигэр Россия хамаандатын састаабыгар киирсэн, Дьокуускай куорат  3 №-дээх спортивнай оскуолатын иитиллээччилэрэ Иван Оконешников бастаабыта, Петр Константинов үһүс буолбута. Ити дьыл Россия хамаандатын ити саастаахтарга иккис састаабыгар киирэн Егор Слепцов Европа түһүлгэтигэр кыттан, үһүс миэстэлэммитэ.

2014 сыллаахха, бу спорт кыһатын саамай киэн туттар иитиллээччитэ, бастакы хараҥаччыта, билигин Беларусь хамаандатын эдэрдэргэ сүрүн тренерэ, спорт үтүөлээх маастара Владислав Андреев аан дойду чемпионатыттан боруонса мэтээли аҕалбыта. Ону тэҥэ кини Европа чемпионатын түөрт мэтээлин ылары ситиспитэ.

Онтон аҕыйах хонугунан Ханчжоуга (Кытай) Азия XIX сайыҥҥы оонньууларыгар тустарга бэлэмнэнэр икки Олимпиада кыттыылааҕа, Кыргызстан Республикатын үтүөлээх маастара Айаал Лазарев – тренер И.С. Кочкин салалтатынан бу оскуолаҕа эрчиллэ сылдьыбыта. Онон Айаалы кинилэр бэйэлэрин иитиллээччилэринэн ааҕыналлар.

Оскуола 2016 сылтан – ССРС спордун маастара, Саха Республикатын үтүөлээх тренерэ, ССРС профтехүөрэхтээһинин туйгуна, Россия физическэй культураҕа уонна спорка үтүөлээх үлэһитэ Валерий Петрович Керемясов аатын сүгэр.

Бу тустуу кыһатын салалтатын уонна коллективын сүрүн сыаллара – оҕолору эт-хаан өттүнэн сайдыылаах, төрөөбүт дойдуларын таптыыр, обществоҕа туһалаах дьон буола улааталларыгар иитии, эрчийии уонна биллэн турар, Саха сиригэр улахан таһымнаах күрэхтэһиилэртэн дьоһун мэтээли ситиһии буолар. Оскуола – саха спорда, тустуута сайдыытыгар улахан кылааттарын киллэрбит уонна киллэрсэ сылдьар специалистарынан, үтүөлээх тренердэринэн: Прокопий Семенович Ивановунан, Валерий Петрович Керемясовынан, Иннокентий Семенович Кочкинынан, Михаил Михайлович Каженкинынан уо.д.а. киэн туттар.

Тустуу кыһатын дириэктэринэн СР физическэй култуураҕа уонна спорка үтүөлээх үлэһитэ, Российскай Федерация физическэй культураҕа үтүөлээх үлэһитэ, РФ уопсай үөрэхтээһиҥҥэ бочуоттаах үлэһитэ, көҥүл тустууга бэтэрээннэргэ аан дойду чемпиона Федот Архипович Соловьев 1998 сылтан таһаарыылаахтык үлэлээбитэ. Онтон 2020 сылтан оскуоланы Саха Республикатын физическэй культураҕа туйгуна, Бүтүн Россиятааҕы категориялаах судьуйа, хапсаҕайга спорт маастара Василий Васильевич Уйгуров салайар.

Оскуола салалтатын, бары тренердэри, үлэһиттэри 25 сыллаах кэрэ бэлиэ үбүлүөйгүтүнэн истиҥник эҕэрдэлээн туран, саха норуота, саха спорда сайдарын туһугар сыралаах үлэҕитигэр ситиһиилэри баҕарабыт!       

Петр ПАВЛОВ.