Ньурбаҕа «Түөлбэ Боотура»

Ньурба куорат 26 сааһын туолар үөрүүлээх бырааһынньыгар, Степан Васильев аатынан сынньалаҥ пааркатыгар дьоҥҥо-сэргэҕэ анаан араас тэрээһиннэр ыытылыннар.

Биир бастыҥ, көхтөөх, дьон болҕомтотун тарпыт күрэхтэһииннэн “Түөлбэ Боотура” буолла. Манна Ньурба ньургуннара – күүстээх-уохтаах уоланнар күөн күрэстэстилэр, илин-кэлин түһүстүлэр.

Ньурбалар кус быһыйдарын, кынаттаах кылыыһыттарын, кылбар хапсаҕайдьыттарын туоһулуур бэрт тэрээһин үрдүк таһымҥа ааста. Уопсайа тоҕус эр хоһуун сүрүн сахалыы көрүҥнэргэ кытынна.

Маҥнай 300 миэтирэҕэ сүүрүү, онтон төрүт көрүҥҥэ – хапсаҕайга күрэхтэһии. Үс төгүл үс: кылыы, буур, куобах, ким чэпчэкитин, дайан ыстанарын көрдөрдө. «Өһөс торбос» көрүҥҥэ хараактыр бөҕөтө, күүс-уох көһүннэ. Түмүктүүр күрэс – оҕунан ытыы. Манна кыраҕы харахтаах, сахалыы оҕунан тутта үөрүйэх бастыҥ кыттааччы билиннэ.

Боотурдарбыт бары даҕаны кыахтарын, күүстэрин ууран туран өрө күүрүүлээхтик кииристилэр. Көрөөччүлэргэ, ыалдьааччыларга уонна спорду сэҥээрээччилэргэ олус сэргэх тэрээһин буолла. Күрэхтэһии кыайыылааҕынан “Вертолётка” түөлбэтин эр хоһууна, барытыгар дэгиттэр Виталий Воронов таҕыста. Кини бэйэтигэр тэҥнээхтэрин булбата. Иккис бочуоттаах миэстэҕэ “Портовской” түөлбэттэн Василий Тогонохов тигистэ. Үһүс миэстэни ылары “Лермонтовскай” түөлбэттэн Арсен Павлов ситистэ. Кини ыарахан атлетиканнан дьарыктанара төһүү күүс буолла.

Дьэ ити курдук Ньурба куорат күнүгэр, Ньурба куоратын эр бэртэрэ көрөргө умсугутуулаах, көхтөөх күрэхэһиини бэлэхтээн дьон-сэргэ махталын ыллылар, сүргэтин көтөхтүлэр. Өрүү да маннык сэргэх тэрээһиннэр ыытылла турдуннар.

Анжелина Жданова, «Ыллык» пост, Ньурба, Хаҥалас.