Сонуннар

Ярыгин-2024: Айсен Потапов – боруонса мэтээллэннэ!

Красноярскай. «Иван Ярыгин Кубога» спортивнай тустууга норуоттар икки ардыларынааҕы турнир иккис күнүн бүтэһик хапсыһыылара ыкса түүн түмүктэннилэр.

Ыарахан ыйааһыҥҥа Никита Хабаров – Турция, Дагестан бөҕөстөрүн кыайталаан баран, финал чиэппэригэр Россия экс-чемпиона Анзор Хизриевы (Санкт-Петербург) утары таҕыста. Бэрт сытыытык, тыҥааһыннаахтык барбыт хапсыһыыга очукуонан сабырыттаран кэбистэ.

Салгыы күрэхтэһиигэ Хизриев финалга тахсар иһин хапсыһыыга Остап Пасеногы кытта киирсиэхтээх этэ да, киһитэ эчэйиилээх буолан көбүөргэ тахсыбата. Онон Никита «санааны уоскутар» бөлөххө тустар буолла.

Дьэ, онтон үһүс миэстэ иһин киирсиилэр саҕаланнылар. Хомойуох иһин, былырыын дьахталларга икки мэтээллээх эбит буоллахпытына, быйыл кыргыттарбыт быһаарыылаах киирсиилэргэ хоттортоон кэбистилэр. Онон ыйааһыннарыгар бэһис миэстэлэннилэр.

Онтон эр дьонно 57 кг боруонса мэтээл иһин тустууга Арыйаан Тютрин – узбек Гуламжон Абдуллаевка хотторон кэбистэ. Манна биһиги бөҕөспүт эчэйии ылан сыл аҥара кэриэтэ тустубатаҕа таайда диэххэ сөп. Бу Красноярскайтан саҕалаан күүскэ дьарыктанан урукку таһымыгар киирэригэр баҕарыахха.

Салгыы киирсиилэргэ 70 киилэҕэ Айсен Потапов (тренерэ А.К. Константинов) чечен Магомед-Эми Эльтимировы кытта көрүстэ. Итиэннэ биһиги үөрүөхпүт иһин, опытынан уонна тура күүһүнэн баһыйан 4:1 ахсаанынан кыайыыны ситистэ. Итинэн Саха сирин хамаандата билиҥҥитэ биир мэтээллэннэ. Эҕэрдэлиибит!

Бу кылгас кэм иһигэр Дьааҥы ыччата, 25 саастаах Айсен Потапов – Д.Миндиашвили аатынан Бүтүн Россиятааҕы турнир, Н.Тарскай кэриэһигэр Саха сирин чемпионатын кыайыылаахтарынан уонна бу, Иван Ярыгин Кубога курдук улахан таһымнаах түһүлгэ призерунан буолары ситистэ. Уолбут тустуутун видеота:

Спортсменнарбыт тустуулара:

125 кг Никита Хабаров – А.Хизриев (С-Петербург) 1:3

50 кг Александра Карамзина – П.Лукина (Россия) 1:8

55 кг Севиль Назарова – Бат Очир (Монголия) 0:10

59 кг Евгения Огородникова – К.Билимбекова (Кыргызстан) 0:11

57 кг Арыйаан Тютрин – Г.Абдуллаев (Узбекистан) 0:4

70 кг Айсен Потапов – М.Эльтемиров (Чечня) 4:1.

Ярыгин Кубогын үһүс күнэ Дьокуускай бириэмэтинэн күнүс 13:00 чаастан саҕаланар. Эр дьоҥҥо 74, 86, 92, 97 кг ыйааһыннаахтар күрэхтэһиини саҕалыахтара. Манна биһигиттэн Николай Сивцев, Ньургун Сергин, Максим Толмачев уонна дьахталларга Лилияна Рожина (68 кг) тустуохтара.

Биһиги сайтпытын уонна ютуб каналбытын кэтээн, турнир сонуннарын, түмүктэрин истэ-билэ сылдьаргытыгар ыҥырабыт.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

199555
Бүгүн : 471