Тарскай-2024: Куонкурус кыайыылааҕа – Андрей Александров

Саҥа үүммүт сыл биир улахан күрэхтэһиитэ – Н.Н. Тарскай аатынан көҥүл тустууга Саха сирин үрдүнэн биирдиилээн уонна хамаанданан бастыыр иһин чемпионатыгар анаан, үгэһинэн куонкурус тэрийбиппит. Онно барыта 38 киһи кытынна.

Түмүккэ, киирбит хоруйдары сыныйан көрүү-ааҕыы, үөрэтии кэнниттэн кыайыылааҕынан үс тустуу маастара, спорт бэриниилээх ыалдьааччыта Андрей Александров (Дьокуускай) буолла. Кини 13-тэн – 10 очукуону ылла. Ол аата, 7 чемпиону уонна бастыҥ хамаандалары уот харахха таайбыт. Манна даҕатан эттэххэ, Андрей биһиги куонкуруспутугар бу кылгас кэмҥэ иккис төгүлүн субуруччу бастаата. Ол курдук, күһүн балаҕан ыйыгар ыытыллыбыт аан дойду чемпионатыгар анаан ыыппыт куонкуруспутугар кыайбыта. Уопсайа, «Дьулурҕан» ыытар маннык тэрээһинигэр сыыстарбат буоллахпытына, алтыс төгүлүн бастаата.

Кыайыылаах Андрей Александрову эҕэрдэлиибит! Киниэхэ Саха Республикатын физическэй култуураҕа уонна спорка министиэристибэтэ туруорбут, Саха сиригэр физкултуура хамсааһына саҕаламмыта 100 сылыгар ананан тахсыбыт «История физической культуры и спорта Якутии» диэн суруналыыс Родион Кривогорницын бэлэмнээн таһаарбыт саҥа кинигэтэ туттарыллыаҕа.

Куонкурус кыттааччыларыттан Айаар, Айсен Молуков, Наталия Александрова (эмиэ А.Александров курдук 7 чемпиону таба эппит), Татьяна Хомподоева, Егор Капитонов 8-тыы очукуону хомуйан, куһаҕана суох көрдөрүүлэммиттэрин бэлиэтиэххэ сөп. Манна сыһыары тутан эттэххэ, Т. Хомподоева Максим Толмачеву чемпионнуо диэн сөпкө эппит гынан баран, кинини 97 киилэҕэ суруйбут. Онтон дьиҥэ Толмачев 92 киилэҕэ бастаабыта, онон сөптөөх хоруйунан ааҕыллыбат. Ити курдук, хас да киһи М.Толмачеву, Н.Софроновы ааттаабыттар гынан баран, ыйааһыннарын бутуйбуттар.

«Дьулурҕан» тэрээһинигэр кыттыбыттарга барыларыгар барҕа махтал! Өссө да көхтөөхтүк кыттаргытыгар ыҥырабыт.

Петр ПАВЛОВ.