Ярыгин-2024: Боруонса иһин биэс киһибит киирсиэ

Красноярскай. «Иван Ярыгин Кубога» спортивнай тустууга норуоттар икки ардыларынааҕы турнир иккис күнэ салҕанан барар. Бүгүн эр дьоҥҥо 65, 79 уонна 125 кг ыйааһыннаахтар күрэхтэһиини саҕалаатылар.

Онуоха биһигиттэн эрдэ иһитиннэрбиппит курдук, 4 бөҕөс кыттыбыта. Кинилэртэн Ньургун Скрябин (65 кг) бастакы эргииргэ Дагестан эдэр талааннаах тустууга Далгат Абдулкадыровка 2:4 ахсаанынан хотторбута.

Бу ыйааһыҥҥа иккис киһибит – республика быйылгы чемпиона Дьулусхан Тотонов маҥнай көбүөр хаһаайына Олег Анзины киирээт көрүөх бэтэрээ өртүгэр ахсааны 10:0 оҥорон, хапсыһыыны болдьоҕун иннинэ очукуонан ыраас кыайыыны ситиспитэ. Салгыы күрэхтэһиигэ кини Д.Абдулкадыровка ыраастык баран хаалла.

Онон Далгат икки уолбутун иккиэннэрин кыайда. Мантан салгыы аны киниэхэ ыалдьабыт. Финалга тахсар түгэнигэр, биһиги бөҕөстөрбүт салгыы тустар кыахтаналлар.

20 саастаах Роман Николаев (79 кг) – улахан түһүлгэ тыынын уйбата диэххэ сөп. Осетин Цоколаевка хотторон кэбистэ.

Ол оннугар ыарахан ыйааһыҥҥа тустар Никита Хабаров бастакы киирсиитин кыайда. Маҥнай утаа кини турок Бюйюкчингелгэ атахха киллэттэрэн уонна салгыы «кириэскэ» эргиттэрэн, 0:4 ахсаанынан хотторон испитэ. Онтон эр санаатын ылынан уонна кыайыыга дьулуурун көрдөрөн, киһитин бэйэтин халыҥ күөнүнэн тоҕута түһүөлээн, түмүккэ ахсаанын 5:4 бэйэтин туһатыгар оҥордо. Ону бу бэриллэр видеоҕа көрүҥ.

Онон турнир иккис күнүгэр Никита Хабаров салгыы туста сылдьар. Салгыы күрэхтэһиигэ кини аны дагестанец Г.Алижудиновы 3:1 ахсаанынан кыайда.

Киэһэ 20 чаас 15 мүн. финаллар саҕаланаллар. Онно биһигиттэн Арыйаан Тютрин, Айсен Потапов, Александра Карамзина, Севиль Назарова уонна Евгения Огородникова – бары боруонса мэтээл иһин тустуохтара. Спортсменнарбытыгар ситиһиилээх кыттыыны баҕарабыт.

Петр ПАВЛОВ.