Нур-Султан: Куонкурус кыайыылааҕа – Айсен Молуков

Көҥүл тустууга аан дойду чемпионатын көрсө үгэс быһыытынан “Дьулурҕан” тустууну таптааччыларга анаан куонкурус биллэрбитэ. Куонкуруска республика араас муннугуттан барыта 63 киһи бэйэтин хоруйун ыытта. Сорудахпыт икки ыйытыыттан турбута: 1. Ыйааһыннарынан кимнээх чемпионнуохтарай? 2. Россия хамаандатыттан кимнээх иккис, үһүс миэстэни ылыахтарай?

Бастатан туран, куонкуруска кыттыбыт дьоҥҥо барыларыгар барҕа Махтал! Өрүү даҕаны сүрүннээн тустууну сырдатар биһиги сайтпытын (http://dzulurgan.ru) көрө, ааҕа сылдьаргытыгар, кини ыытар үлэтигэр көхтөөхтүк кыттаргытыгар баҕарабын.

Чемпионат түмүктэннэ, ону кытта тэҥҥэ куонкурус кыайыылааҕа быһаарылынна. Син эмиэ спорка курдук, биһиги тэрээһиммит сүрдээх хатыһыылаах уонна тыҥааһыннаах буолла. Ол курдук, чемпионат бүтэһик кыайыылаахтара быһаарыллыбыттарын кэннэ тута, куонкурус кыайыылаахтарын билгэлээһиннэрин хат-хат сыныйан ааҕыы, суоттааһын буолла.

Ол түмүгэр тустуу бэриниилээх ыалдьааччыта Айсен Молуков, көҥүл тустууга ССРС, хапсаҕайга Саха сирин спортарын маастара, “Дьулурҕан” куонкурсун кыайыылааҕа буола сылдьыбыт Андрей Александров уонна республикатааҕы “Спорт Якутии” хаһыат кылаабынай редактора Александр Посельскай 10-нуу очукуону хомуйдулар. Куонкурус балаһыанньатынан, кыайыылаах биир буолуохтаах, тэҥнэһии түгэнигэр ким бэйэтин хоруйун инники ыыппыт – ол бастыыр диэн эрдэттэн эппиппит. Онон биһиги куонкуруспут кыайыылааҕынан, хара бастакыттан чорбойбут, бэйэтин хоруйун тохсус киһинэн ыыппыт Айсен МОЛУКОВ буолла. Эҕэрдэлиибит!

Кини – Завур Угуев, Гаджимурад Рашидов, Давид Баев, Кайл Дэйк, Хассан Яздани, Джейден Кокс, Абдурашид Садулаев, Гено Петриашвили чемпионнуулларын уонна Гаджи Набиев, Алихан Жабраилов үһүс буолалларын сөпкө таайбыт.

Куонкуруска өссө Василий Алексеев, Егор Капитонов, Артур Дыдырысов, Федора Захарова, Валерий Гаврильев, Василий Обулахов, Спартак Дорофеев 9-туу очукуону ылан, куһаҕана суох көрдөрүүлэммиттэрин санатар тоҕоостоох.

Эрдэ иһитиннэрбиппит курдук, кыайыылаах киһи бу күннэргэ ааптартан илии баттааһыннаах көҥүл тустууга бары олимпийскай чемпионнар тустарынан “Покорившие Олимп” кинигэ-бирииһинэн наҕараадаланыаҕа.

Өссө төгүл кыайыылаах Айсен Молуковы эҕэрдэлиибит! Куонкуруска кыттыбыт тустууну таптааччыларга махтанабыт! “Дьулурҕан” аныгыскы маннык тэрээһинигэр көхтөөхтүк кыттаргытыгар ыҥырабыт! Дьоллоох, ситиһиилээх уонна бааттаах буолуҥ!

Петр ПАВЛОВ.

Нур-Султан: Куонкурус кыайыылааҕа – Айсен Молуков: 1 комментарий

  1. Федора Валерьевна Захарова

    Күүтүүлээх тустуубут нур султаҥҥа буолан бүттэ.туох санаалары сахтылар бу ааспыт күннэр. Дьэ күүтүүлээх ,элбэҕи эрэннэрбит ,сэмээр үтүө түмүктэри кэтэспит 6 уолбут атын дойду аатыттан легионердаан кыттыылара этэ. Күрэхтэһии бастакы күнүттэн үөрүү кыыма умуллан барбыта. Биһиги уолаттарбыт күүстээх утарсыыны оҥорботулар.тоҕо? Туох тиийбэтэ? Бу үлүгэр олимпиадаҕа кыттар дьылҕа быһаарыллыытыгар, нэс тустууну көрдөрдүлэр. Баҕар мин дьахтар киһи сыыһа ырытарым буолуо.бу ырытыы да буолбатах ыалдьааччы быһыытынан тус санаа. Наһаа эрэммитим ньургун скрябиҥҥа, николай охлопковка.онтум атын хартыына көстөн таҕыста. Санаан кэллим леонид спиридоновы.оо ,олимпиадаҕа хайдахтаах курдук киирсии этэй,кыранан да мэтээли мүччү туппуппут этэ. Ол тустууга атылыы көрдөххө бу күрэхтэһиигэ ,төһө да олимпиада буолбатаҕын иһин , мөхтөх кыттыы, сиикэй түмүктэр. Оо спиридонов чаҕылытан хайдахтааз курдук тилэхтэн ыларый! Киһи көрөн астынар этэ. Оннук уоттаах киирсиини биһиги уолаттарбыт көрдөрбөтүлэр. Маннык көстүүнү ааттаах- суоллаах тустууктарбыт туох дииллэрэ буолла? Дьэ, олимпиадаттан көрө мэлийдибит,кураананх ытыспытын сотуннубут дии. Чэ бу мин тус бэйэм санаам. Онтон дьулурҕан куонкуруһугар кыттан син эппиэттэһэ сатаабыппын. Биллэн туран эр дьон билэр бөҕө буоллахтара дии,онон да олордохторо. Кыайыылааҕы эҕэрдэлиибин.Инникитин маннык аралдьытар куонкурустарда оҥоро туруҥ.

Добавить комментарий

Ваш e-mail не будет опубликован. Обязательные поля помечены *