Кинигэ сүрэхтэниитигэр гроссмейтер эксээмэн тутта

Муус устар 9 күнүгэр Семен, Софрон Даниловтар ааттарынан Духуобунас киинигэр “Родничок” оҕо уһуйаана бэлэмнээн таһаарбыт «Дуобат дьикти абылаҥар» саҥа кинигэ сүрэхтэниитэ буолла.

Тэрээһиҥҥэ улуус салалтата, Дьокуускайтан аан дойдутааҕы гроссмейстер Иван Токусаров, тренер Иван Павлов кытыннылар. Горнайга элбэх оҕоҕо дуобат абылаҥын иҥэрбит, чочуйбут тренердэр Степан Заровняев, Михаил Сивцев, Руслан Колодезников иитиллээччилэрин үөрүүлэрин үллэһиннилэр.

Аан дойдуга киэҥник сэҥээриллэр спорт көрүҥүн туһунан сырдаттылар. Саҥа кинигэни олус астына көрөн, сөхтүлэр, махтайдылар.

“Родничок” оҕо уһуйаанын сэбиэдиссэйэ Ньургустана Абрамова кинигэ ис хоһоонун сырдатан туран, оҕолору дуобакка угуйбут Оксана, Степан Заровнявтар дьиэ кэргэттэригэр, төрөппүттэргэ, кинигэ бэчээттэнэригэр көмөлөспүт, өйөөбүт дьоҥҥо махтал тылларын анаата.

Ыҥырыылаах ыалдьытынан горнайтан бастакы гроссмейстер Тунаара Федорова буолла. Киэн туттар спортсменкабытыгар истиҥ эҕэрдэлэри эттилэр. Инникитин да улууһун аатын ааттата турдун диэн Алгыс тыллар ананнылар.

Бу күн аан дойду чемпионката 20 дуоскаҕа кыра оҕолорго уонна улахан дьоҥҥо сеанс биэрдэ. Бары даҕаны олус умсугуйан туран оонньоотулар. Тунаара оҕолор үчүгэй бэлэмнээхтэрин бэлиэтээтэ. “Родничок” оҕо уһуйаана ыытар күрэхтэһиититтэн кынат анньынан, улахан кыайыыларга тиийбитин чорботон бэлиэтэтэ. Ити күрэхтэһии суоҕа буоллар, дуобакка ылларарым саарбах диэн махтана этэр.

Сеанс түмүгүнэн улахан дьоҥҥо Семен Павлов кыайыы өрөгөйүн биллэ. Оҕолортон Айыына Константинов, Надя Заровняева, Кирсан Ковров, Дамир Данилов, аҕам саастаах дьонтон Афанасий Говоров, Николай Павлов тэҥнэстилэр.

Тунаара Федорова көрсүһүү кыттыылаахтарыгар махталын эттэ. Бастыҥ оонньууну көрдөрбүт дьоҥҥо ситиһиилэри баҕаран туран, сэмэй бэлэҕин уунна.

Вячеслав АЛЕКСЕЕВ. Горнай – Бэрдьигэстээх.

Ааптар хаартыскаҕа түһэриитэ.