Тарскай-2026: ханнык хамаанда бастыай?  

Кулун тутар 28-29 күннэригэр Ытык Күөлгэ, А.Е. Турнин аатынан күрэс уораҕайыгар Николай Николаевич Тарскай кэриэһигэр көҥүл тустууга Саха сирин биирдиилээн уонна хамаанданан бастыыр иһин чемпионата ыытыллар.

Быйылгы чемпионат республикаҕа тустуу сайдыбыта 70 уонна саха бөҕөстөрө – Павел Пинигин, Роман Дмитриев, Александр Иванов Монреаллааҕы-1976 Олимпиадаҕа өрөгөйдөрүн 50 сылларыгар ананар.

Манан сибээстээн, ыйааһын ахсын улуустар бастыҥ тустууктарын ааттарынан анал бириистэр туруоруллаллар. Ол курдук, 57 киилэҕэ таатталар, сахалартан аан дойду бастакы чемпиона Илларион Федосеев аатынан бирииһи олохтууллар. 61 кг бастаабыт тустуук – аммалар олохтообут, номоххо киирбит Николай Захаров – Сахаачча аатынан бирииһинэн наҕараадаланыаҕа. 65 кг кыайыылааҕар – сахалартан уолаттарга бастакынан ССРС-ка чемпионнаабыт Вячеслав Карпов аатынан бирииһи чурапчылар туруораллар.

Ити курдук, үбүлүөйдээх чемпионакка биллиилээх бөҕөстөр Владимир Андросов, Николай Неустроев, Максим Сибиряков, Юрий Андреев, Василий Румянцев уо.д.а. ааттарынан анал бириистэр баар буолуохтара.

Саха Республикатын физическэй култуураҕа уонна маассабай спорка управлениетыттан биллэрбиттэринэн, үс бастакы миэстэни ылбыт хамаандалар туһааннаах кубоктары тэҥэ харчынан бириистэргэ туоһу суруктары тутуохтара. Ол курдук, бастаабыт хамаанда – 300, иккис буолбут – 200 уонна үһүстээбит – 100 тыһ. солк. харчынан наҕараадаланыа.

Сабаҕалаан көрдөххө, бастакы миэстэ иһин Чурапчы, Мэҥэ Хаҥалас, Сунтаар, Уус Алдан, Дьокуускай, Таатта, Нам, Амма хамаандаларын икки ардыларыгар киирсии буолара буолуо. Уруккуттан билиҥҥэ диэри, саха омуга ордук сөбүлүүр – көҥүл тустуу күрэс көрүҥэр хамаанданан бастааһын үрдүктүк тутуллар уонна ытыктабылынан сыаналанар. Кыайыылаахтар ааттара үйэ саас тухары номоххо киирэн, “Саха сирин чемпиона” диэн үйэтитиллиэ. Дьэ манна көстүөҕэ, ханнык улуус түмсүүлээҕэ, тэрээһиннээҕэ, көҥүл тустууга сөптөөх болҕомтону уурара.

Санатан эттэххэ, былырыын Сунтаарга ыытыллыбыт чемпионакка хамаанданан түмүккэ – Чурапчы бастакы, Сунтаар иккис, Мэҥэ Хаҥалас үһүс миэстэлэри ылбыттара. Оттон ыйааһыннарыгар чемпионнарынан буолбуттара: 57 кг – Кэскил Семенов (Сунтаар), 61 кг – Артем Слепцов (Чурапчы), 65 кг – Юлиан Григорьев (Сунтаар), 70 кг – Ньургун Скрябин (Мэҥэ Хаҥалас), 74 кг – Константин Капрынов, 79 кг – Олег Фомин (иккиэн Чурапчы), 86 кг – Анатолий Никитин (Мэҥэ Хаҥалас), 92 кг – Андриан Ленскэй (Чурапчы), 97 кг – Ньургун Сергин (Сунтаар), 125 кг – Никита Софронов (Чурапчы).

Быйыл дьэ хайдах буолар, кимнээх бастыыллар? Чемпионаты “Саха” национальнай көрдөрөр-иһитиннэрэр хампаанньа “күөх экранынан” быһа көрдөрүөҕэ.

Чемпионат тосхоло

Кулун тутар 27 күнэ, бээтинсэ

11:00-17:00 Кэлбит хамаандалары бэлиэтээһин.

17:00-18:00 Судьуйалар уонна хамаандалар салайааччыларын сүбэ мунньахтара.

18:00-18:30 Бары ыйааһыннарга сэрэбиэй.

Кулун тутар 28 күнэ, субуота

08:00-08:30 Медицинскэй көрүү уонна ыйааһыннаныы.

10:00-16:00 Барыллааһын хапсыһыылар.

16:00-16:40 Чемпионаты үөрүүлээхтик аһыы.

17:00-19:00 Финалга тахсар иһин хапсыһыылар.

Кулун тутар 29 күнэ, өрөбүл

08:00-08:15 Медицинскэй көрүү уонна ыйааһыннаныы.

10:00-13:00 Санааны уоскутар бөлөх тустуулара.

13:00-15:00 Тохтобул.

15:00-20:00 Быһаарыылаах хапсыһыылар. Кыайыылаахтары наҕараадалааһын.

Петр ПАВЛОВ.