Спорт – сыалы ситиһэргэ үөрэтэр

Мэҥэ Хаҥалас улууһун Павловскай нэһилиэгиттэн сылдьар 17 саастаах Егорова Валя баҕа санаатын толорон, 2023 сыллаахха Кузбасска ыытыллыбыт «Азия оҕолоро» норуоттар икки ардыларынааҕы спортивнай оонньуулар кыһыҥҥы көрүннэригэр кыттыбытын туһунан үллэһиннэ:

–Кыра эрдэхпиттэн спордунан дьарыктанарбын сөбүлүүбүн. 5-с кылаастан хайыһарынан дьарыктанан саҕалаабытым. Үс сыл маҥнайгы тренербин Дь.Ф. Николаевы кытта Павловскайга дьарыктаммытым. Бастаан дьарыгым аҕыйах буолан, курэхтэһиилэргэ наар хотторор этим, ол гынан баран, кэлин элбэх кыһамньылаах эрчиллии кэнниттэн, Алдаҥҥа спорт оскуолатыгар үөрэнэ киирбитим. Элбэхтэ дьарыктанан үчүгэй ситиһиилэнэн, 2022 сылга Саха Өрөспүүбүлүкэтин хамаандатын сүрүн састаабыгар киирбитим. Сыалым биир этэ – “Азия оҕолорун” аан дойдутааҕы оонньуутугар кыттыы. Сыралаах элбэх үлэ кэнниттэн сыалбын ситиспитим.

Оонньуулар 2023 сыллаахха кулун тутарга Кемерово куоракка, Кузбасска ыытыллыбыта. Бу миэхэ саамай үрдүкү чыпчаал күрэхтэһиитэ этэ. Туох баар кыахпынан кыттыбытым. Ити икки нэдиэлэтээҕи күрэхтэһии миэхэ сүрэхпэр куруук хаалыаҕа. Ол кэнниттэн мин үөрэхпин өссө дириҥэтэргэ быһаарынным. Билигин ХИФУ физико-техническэй хайысхалаах лицейыгар Дьокуускай куоракка үөрэнэбин.

Спорт мин санаабар киһиэхэ олус туһалаах: элбэхтэ үлэлээн сыалы сатаан ситиһэргэ үөрэтэр, ону тэҥэ, бэйэни сааһыланарга. Спорт баар буолан элбэх дьону кытта алтыстым уонна араас дойдуну кэрийэн көрүүбүн кэҥэттим. Мин ити сыалбын ситиһэрбэр элбэхтэ уонна күүскэ дьарыктаммытым, Россия араас куораттарыгар күрэхтэспитим уонна дьарыктаммытым. Итинник баҕа санааҕар бэйэҥ итэҕэйэн элбэхтэ үлэлээтэххинэ – барыта хайаан да туолуоҕа!

Валя улууһун аатыттан соторутааҕыта Алдаҥҥа ыытыллыбыт V кыһыҥҥы спартакиадаҕа хамаанданан сприҥҥэ кытынна. Валяҕа баҕарабыт спорт хайысхатын өссө баһыйан, үрдүк чыпчааллары, ситиһиини!

Юра ПАВЛОВ, Мэҥэ Хаҥалас улууһун Хаптаҕай орто оскуолатын 11-с кылааһын үөрэнээччитэ.