Грознай-2024: Андрей Мидловец – Россия чемпиона

Көҥүл тустууга Россия эдэрдэргэ (21-гэр диэри саастаахтарга) күрэхтэһиитигэр бөҕөстөрбүт дьоһун ситиһиилэннилэр. Ол курдук, бэҕэһээ Лев Павлов 57 киилэҕэ чемпионнаабыт эбит буоллаҕына, бүгүн финалларга тустуохтаах түөрт уолбут төрдүөн кыайыыны ситиһэн, туһааннаах мэтээллэринэн наҕараадаланнылар.

61 киилэҕэ бүтэһик быһаарыылаах хапсыһыыга атын утарсааччыларын барыларын сабырыйан икки, Саха сирин хамаандатын уолаттара кыайыылаах аатын ким ыларын быһаарса таҕыстылар. Онуоха Андрей Мидловец (тренерэ Гаврил Игнатьев) – Артём Слепцову 14:4 ахсаанынан баһыйа тутан, бастакы миэстэни ылла. Слепцов – үрүҥ көмүс мэтээли иилиннэ.

Бу ыйааһыҥҥа үһүс киһибит – Эдуард Попов боруонса мэтээл иһин киирсиигэ Саид Гергоковы (Тула) 5:2 ахсаанынан кыайан, ыалдьааччыларын сүрдээҕин үөртэ.

Бу күн хамаандаҕа төрдүс мэтээли Роман Николаев (79 кг) аҕалла. Үһүс бириистээх миэстэ иһин тустууга кини осетин Ибрагим Мисиковы очукуонан ыраастык (11:0) кыайда.

Онон уолаттарбыт бу күрэхтэһиигэ сүрдээх үчүгэй тустууну көрдөрдүлэр, ыалдьааччыларын үөртүлэр.

Хамаандабыт былырыын бу саастаахтарга биир кыһыл көмүс уонна биир боруонса мэтээллээх эбит буоллаҕына, быйыл – 2 кыһыл көмүс, 1 үрүҥ көмүс уонна 2 боруонса мэтээли ылары ситистэ. Түгэнинэн туһанан мэтээлгэ тиксибит уолаттары, кинилэр тренердэрин уонна чуолаан хамаанда сүрүн тренерэ Василий Неустроевы, дьоһун көрдөрүү ситиһиллибитинэн эҕэрдэлиибит!

Петр ПАВЛОВ.