Ким уйана-хатана биллэр кэмэ кэллэ

Ыам ыйын 11-12 күннэригэр Турция Стамбул куоратыгар быйылгы сылга Парижтааҕы сайыҥҥы Олимпиадаҕа көҥүл тустууга бүтэһик сүүмэрдиир күрэхтэһии ыытыллар. Бу быһаарыылаах түһүлгэҕэ саха тустууга кыһатын түөрт иитиллээччитэ кыттар.

57 киилэҕэ Хотугу Македония аатыттан Владимир Егоров, 65 кг Беларусь Республикатыттан Ньургун Скрябин, 74 кг ыйааһыҥҥа Таджикистан чиэһин көмүскүүр Виктор Рассадин, 125 киилэҕэ Кыргызстантан Айаал Лазарев тустуохтара.

Сэрэбиэй быһыытынан Владимир Егоров бастакы эргииргэ Педро Мехиаһы (Венесуэла) кытта киирсэр. Онно хайалара кыайбыт Гонконг – Швейцария бөҕөстөрүн тустуутун кыайыылааҕар тахсыаҕа. Бу, бастакы ыйааһын үөһээҥҥи бөлөҕөр күүстээхтэринэн китаец Зоуну, американец Лины ааҕыахха сөп. Сылыктааһын быһыытынан, Владимир Егоров кинилэртэн биирдэстэрин кытта финал чиэппэригэр көрсүөн сөп. Өссө бу бөлөххө казах Калжан, иранец Сарлак, грузин Дингашвили курдук биллэр бөҕөстөр бааллар.

57 киилэҕэ аллараа бөлөххө Каравус (Турция), Лехр (Германия), Хан (Хотугу Корея), Занданбуд (Монголия), Яценко (Украина), Вангелов (Болгария), Аман (Индия) курдук бөҕөстөрү чорботуохха сөп. Онон састаап – күүстээх!

Ньургун Скрябин бастаан Кристиан Николескуну (Палау) кытта тустар. Иккис эргииргэ кини Европа быйылгы чемпиона Ислам Дудаевы (Албания) кытта киирсиитэ быһаарыылаах буолуоҕа. Бу ыйааһыҥҥа барыта 37 бөҕөс олимпийскай путевка иһин күөн көрсөр.

74 киилэҕэ Виктор Рассадин күрэхтэһиини финал 16/1 саҕалыыр. Утарсааччыта – Азия чемпиона, аан дойду чемпионатын призера казах Нуркожа Кайпанов.

Бу, Олимпиадаҕа сүүмэрдиир бэһис күрэхтэһии, ол үрдүнэн, ыйааһын ахсын кэриэтэ састаап син биир күүстээх. Ылан да көрүҥ, 74 киилэҕэ – Чамизо (Италия), Тохтомамбетов (Кыргызстан), Рамазанов (Болгария), Алиханян (Армения), Валиев (Албания), Кенчадзе (Грузия), Рассадин (Таджикистан), Кайпанов (Казахстан), Хаджиев (Франция), Курамагомедов (Венгрия) – бары үөһэ бөлөххө, Демиртас (Турция), Салказанов (Словакия), Сайпудинов (Бахрейн) – аллараа бөлөххө бааллар. Дьэ, бу дьонтон үс эрэ киһи баҕалаах путевканы ылыаҕа.

Онтон Айаал Лазарев күрэхтэһиини финал 8/1 саҕалыыр. Кини Сумит (Индия) – Джонсон (Ямайка) киирсиитин кыайыылааҕын кытта тустуоҕа. Онно кыайдаҕына дьоппуон Ямамотоны, эбэтэр узбек Рахимовы кытта киирсиэн сөп. Чэ, бээ, этэргэ дылы, инникини тымтыктанан көрбүт суох. Маннык түгэҥҥэ, көбүөр бэйэтэ көрдөрүө дииргэ тиийэбит.

Балаһыанньа быһыытынан, хас ыйааһын ахсын үстүү бастыҥ көрдөрүүлээх бөҕөс – Олимпиадаҕа кыттар быраабы ылыаҕа. Ол курдук, сэрэбиэй түмүгүнэн үөһээ уонна аллараа бөлөхтөртөн финалга тахсыбыттар – быһаччы лицензияҕа тиксэллэр. Онтон кинилэргэ хотторбуттар анал бөлөххө киирэн, ким күүстээҕин быһаарсыахтара. Итиэннэ икки өртүттэн «санааны уоскутар» бөлөх кыайыылаахтара түмүккэ бэйэ-бэйэлэрин кытта утары көрсөн, ким олимпийскай путёвканы ыларын иһин киирсиэхтэрэ.

Ыам ыйын 11 күнүгэр бары ыйааһыннарга барыллааһын хапсыһыылар түмүктэринэн финалистар биллиэхтэрэ. Сарсыныгар «санааны уоскутар» бөлөх тустуулара буолуохтара.

Субуотаҕа күрэхтэһии Дьокуускай бириэмэтинэн 16:00 чаастан саҕаланар. Финалга тахсар иһин киирсиилэри түүн 24:00 чаастан “күөх экраҥҥа” Матч Арена каналга быһа биэриини көрүөххэ сөп.

Бөҕөстөрбүтүгэр ситиһиини баҕарабыт!

Петр ПАВЛОВ.