“Хайыһарга Саха сирин спордун маастара” аат баар дуо?

// Ыйыт – хоруйдуубут

Аҕыйах хонуктааҕыта биир билэр, саастаах киһим “Хайыһарга Саха сирин спордун маастара” диэн аат баар дуо диэн ыйытта. Ону мин тута, хайыһар бэтэрээннэриттэн ыйытан көрдүм да, күттүөннээх хоруйу ылбакка, дуобат международнай категориялаах судьуйата, ФМЖД маастара, РФ үтүөлээх учуутала, Саха сирин физическэй култуураҕа уонна спорка үтүөлээх үлэһитэ, Мэҥэ Хаҥалас улууһун бочуоттаах гражданина, ытыктыыр киһим Дмитрий Васильевич Сыромятниковтан ыйыттым.

Спорт бэтэрээнэ Дмитрий Васильевич – биллиилээх коллекционер, спорт значоктарын, наҕараадаларын кини курдук элбэҕи муспут, быыстапкалаабыт киһи бука суоҕа буолуо. Билэр буоллаҕына, кини этиэ уонна өскөтүн оннук аат баар буоллаҕына, ол значога киниэхэ хайаан да баар буолуохтаах диэн санааттан.

Онуоха Дмитрий Васильевич маннык хоруйдаата:

–Дорообо! “Хайыһарга Саха сирин маастара” диэн аат суох. Ону бигэргэтэр биир да докумуон ылыныллыбатаҕа. Хомойуох иһин, айах кэпсээнигэр баар. Ааспыт үйэ 70-с сылларын бүтүүтэ, арыый кэлин этэ дуу, “улахан спортан” туораабыт дьону өйөөн диэххэ, Бүлүү – Хохочой маршрутунан хайыһар десана оҥорбуттара, хас да күннээх. Олорго маастарга кандидат иҥэрбиттэрэ.

Кэлин атаҕынан сүүрүүгэ итинник, хайыһарга эмиэ сүүрүүлэри тэрийтэлээбиттэрэ. Манныкка кыттыбыттары хомойуох иһин, оннооҕор спортпут салайааччылара – юбилейга, чиэстээһиннэргэ “хайыһарга Саха сирин маастара” диэн кэлэҕэйдээн да көрбөккө этэллэр.

Холобур, 1979, 1980 сс. Уус Алдан, Мэҥэ Хаҥалас марафонецтара: Илларионов, Уваровскай, Слепцов, Заболоцкай, Румянцев уо.д.а. олор истэригэр мин, кулун тутар саҥатыгар Майа – Хочо – Эмис – Амма – Бөтүҥ – Абаҕа – Соморсун – Сулҕаччы – Алтан – Бүтэйдээх – Табаҕа – Майа хайысханан 11 күн устата атахпытынан сүүрбүппүт.

Ити сүүрбүт дьоҥҥо миигиттэн уонна Ылдьаа Скрябинтан уратыларга “чэпчэки атлетикаҕа маастарга кандидат” аатын иҥэрбиттэрэ, Ылдьаа сүрүн тэрийээччибит этэ.

Петр Павлов.