Волейбол – сөбүлүүр дьарыгым

Уус Алдан улууһун Үлэ Геройа Михаил Николаевич Готовцев аатынан Танда орто оскуолатыгар 2003 сылтан Уус Алданннааҕы оҕо спортивнай оскуолатын волейболга филиала аһыллан үлэлиир.

Тренеринэн – Өрөспүүбүлүкэ үтүөлээх тренерэ Аммосов Максим Николаевич билиҥҥэ диэри харыс да халбарыйбакка үлэлии сылдьар. Филиал иитиллээччилэрин саамай улахан ситиһиитинэн – 2022 сыллаахха Бороҕоҥҥо ыытыллыбыт Саха сирин норуоттарын оонньууларыгар 1-кы миэстэни ылбыттара буолар. Элбэхтэ Дальнай Востокка баран волейболга, пляжнай волейболга күрэхтэһэ сылдьыбыттара. Оскуола оҕолоругар ыытыллар «Үрүҥ көмүс мээчиккэ” наар кытталлар, бириистээх миэстэлэри ылаллар. Билигин волейболга Танда эрэ оҕолоро буолбакка,  арааһынай нэһилиэк кыргыттара дьарыктана сылдьаллар. Филиал оҕолоро оскуола оҕолорун күрэхтэһиилэригэр эрэ буолбакка, улахан дьоҥҥо киирэн эмиэ оонньууллар. Билигин 2 хамаанда баар, кыралар уонна улахаттар. Соторутааҕыта 4 кыыс Республика чемпионатыгар 1-кы лигаҕа  кыттыыны ылбыттара. Кинилэртэн Сидорова Нарыйа  санаатын хото үллэстэр:

–Мин волейболунан 4-с сылбын дьарыктанабын. Билигин 9-с кылааска үөрэнэбин, Тандаҕа сайын 2020 сыллаахха сбордана кэлбитим уонна быһаарынан бараммын, волейболунан салгыы дьарыктанар эбиппин дии санаабытым. Тоҕо диэтэргэ, куоракка күрэхтэһэ баран бараммын, миэхэ Максим Николаевич «харахпын аспыта”, онтон сылтаан волейболу сөбүлүүр буолбутум. Чемпионат бириэмэтигэр миэхэ эмоция ынырык напряженнай этэ, бэйэм хамаандабар долгуйар этим. Ол чемпионат буолуон иннинэ күҥҥэ үстэ дьарыктанар этибит. Ол дьарыкпыт көмөтүнэн Чемпионакка 2-с миэстэ буоллубут. Хамаандабыт састааба: капитан Аммосова Аня, Калининская Мичийэ, Иванова Сайыына, Готовцева Аня, Дегятрева Женя, Захарова Марина, Евдокимова Виргиния, Аммосова Уруйдаана уонна саппааска Егорова Женя, Андросова Василина, Троева Лида, Сидорова Нарыйа (оскуола кыргыттара) сылдьыбыппыт.

Биһиги уруккуттан бииргэ оонньуур буоламмыт, бэйэ-бэйэбитин үчүгэйдик билсэбит, өйөһөбүт. Волейболлуурбун наһаа сөбүлүүбүн, күрэхтэһии буоларыгар үөрэбин уонна саамай күүтэрбит, Тандаҕа саҥа спортзал тутулларын. Кыра эрдэхпинэ аҕам наар таһар, болейдыыр этэ күрэхтэһиилэргэ. Барыгытын волейболунан дьарыктанаргытыгар сүбэлиибин.

Дьэ, маннык биир күрэхтэһииттэн санаатын үллэстибитигэр Нарыйаҕа махтанабыт уонна киниэхэ салгыы ситиһиилэри баҕарабыт.

Ариана СИВЦЕВА, Танда оскуолатын 11-с кылааһын үөрэнээччитэ.

Уус Алдан.