Василий Егоров Европа чемпионатыгар

Муус устар 18 күнүттэн Сербия киин куоратыгар Белградка, эр дьоҥҥо Европа боксаҕа чемпионата саҕаланар.

51 киилэҕэ Россия чиэһин – Европа икки төгүлээх чемпиона, аан дойду чемпионатын иккис призера, спорт үтүөлээх маастара Василий Егоров көмүскүөҕэ. Кини маннык итэҕэли тохсунньуга Самараҕа буолбут Олег Саитов аатынан Россия күүстээхтэрин Кубогар ситиһиилээхтик кыттан ылбыта.

Онно бүтэһик быһаарыылаах киирсиигэ Василий Россия чемпиона Баир Батлаевы баһыйа туппута (видеоны көр). Ол кэмтэн ыла дойду сүүмэрдэммит хамаандатын састааба анал үөрэтэр-эрчийэр түмсүүгэ сырытта.

Европа чемпионатын сэрэбиэйэ сарсын буолар. Онно билиэхпит, уолбут утарсааччыларынан кимнээх буолалларын.

Россия хамаандатын састааба:

48 кг – Эдмонд Худоян (Челябинскай), 51 кг – Василий Егоров (Москва уобалаһа, Саха сирэ), 54 кг – Дмитрий Двали (Москва уобалаһа, Забайкальскай кыраай), 57 кг – Эдуард Саввин, 60 кг – Всеволод Шумков (иккиэн Санкт-Петербург), 63,5 кг – Габил Мамедов (Оренбург), 67 кг – Тархан Идигов (Чечня), 71 кг – Игорь Свиридченков (Воронеж), 75 кг – Джамбулат Бижамов (Тула), 80 кг – Савелий Садома (Хабаровскай), 86 кг – Шарабутдин Атаев (Москва уобалаһа, Дагестан), 92 кг – Муслим Гаджимагомедов (Москва уобалаһа, Краснодарскай кыраай), + 92 кг – Ярослав Дороничев (ХМАО-Югра).

Вася, кытаат!

Дьулурҕан.