Мирнэй көбүөрүгэр көрсүөхтэрэ…

Муус устар 8-9 күннэригэр Мирнэйгэ Монреаллааҕы-76 Олимпиада үрүҥ көмүс призера, спорт үтүөлээх маастара Александр Иванов аатынан АЛРОСА бирииһигэр көҥүл тустууга Бүтүн Россиятааҕы турнир ыытыллар.

Бу түһүлгэҕэ дойду 10 регионуттан барыта 55 бөҕөс сэрэбиэйи ааста. Кыттааччылар ортолоругар Начын Монгуш (Тыва), Жаргал Дамдинов (Бурятия), Константин Капрынов, Виктор Рассадин, Ньургун Сергин, Никита Хабаров курдук күүстээхтэр бааллар. Кылгастык ыйааһыннарынан кыттыылаахтары билиһиннэрдэххэ маннык:

57 кг Петр Копылов, Алексей Копылов, Начын Монгуш, Любомир Ашеин биир бөлөххө түбэспиттэр. Иккис бөлөххө соторутааҕыта Аллараа Бэстээххэ ыытыллыбыт күрэхтэһии кыайыылааҕа Харысхал Григорьев уонна Егор Явловскай, Алексей Данилов киирбиттэр.

Дьэ, манна Копыловтар – Монгуһу кытта тустууларын кэтээн көрүөхпүт. Бүгүҥҥү күҥҥэ ханнык таһымҥа сылдьалларын.

61 киилэҕэ 14 кыттааччы баар. Соторутааҕыта 21-гэр диэри саастаахтарга Дальнай Восток федеральнай уокуругар бастаабыт Александр Авелов – Жаргал Дамдиновтыын квалификацияҕа утары көрсөр буолбуттар. Өссө бу ыйааһыҥҥа Федор Постников, Яков Павлов, Уйгулан Иванов, Петр Константинов, Валентин Бурнашев, Дьулус Федотов, Амыр Чамзын (Тыва) бааллар. Онон сытыы хапсыһыылары кэтэһэбит.

65 кг быйыл кыһын Бурятияҕа буолбут Дальнай Восток чемпионатын кыайыылааҕа Дьулусхан Тотонов опытттаах бөҕөс – Кежик Чымбаны кытта тустуута интэриэһинэй буолуо.

70 киилэҕэ төрдүөлэр. Манна, Красноярскайдааҕы Иван Ярыгин кэриэһигэр турнир призера Константин Капрынов баар.

74 кг – бэһиэлэр. Билиҥҥи кэмҥэ биир тумус туттар бөҕөспүт Виктор Рассадин эчэйиинэн сибээстээн сыл аҥардаах тохтобул кэнниттэн быйылгы сылга бастакы тустуутун көрүөхпүт.

79 кг Андриан Ленскэй – Никита Сучков хапсыһыыларын кыайыылааҕа, бастыыра буолуо. Эһиги туох дии саныыгыт?

86 кг аҕыйах хонуктааҕыта Аллараа Бэстээххэ Дальнай Восток федеральнай уокурук күрэхтэһиитин кыайыылааҕа Максим Судаков, былырыын күһүн А.Крылов кэриэһигэр Бүтүн Россиятааҕы турнирга бастаабыт, өссө сүрүн бириис хаһаайынынан буолбут Дмитрий Зайнитдинов (Красноярскай), уонна норуоттар икки ардыларынааҕы кылаастаах спорт маастара Герман Устинов бааллар. Дьэ, хайалара бастыыр?

92 киилэҕэ төҕө да аҕыйахтарын иһин, күүстээхтэр түмсүбүттэр диэххэ сөп. Дальнай Восток федеральнай уокурук 21-гэр диэри саастаахтарга күрэхтэһиитин кыайыылаахтара Сосо Тороян (Хабаровскай), Никита Софронов уонна көбүөр хаһаайына, Саха сирин сүүмэрдэммит хамаандатын хапытаана Ньургун Сергин үчүгэй тустууну көрдөрүөхтэрэ диэн кэтэһэбит.

97 кг – үһүөлэр. Кинилэртэн Максим Толмачевы чорботуохха сөп.

125 киилэҕэ – бэһиэлэр: Никита Хабаров, Андрей Аронов, Эдуард Максимов, Шота Кортиев (Иркутскай), Хасан Хубаев (Москва).

Кылгастык кыттааччылары билиһиннэрдэххэ итинник. Дьэ, үчүгэй тустууну кэтэһэбит. Этэргэ дылы, ким үчүгэй бэлэмнээх, кыайыыга дьулуурдаах – ол кыайдын!

Петр ПАВЛОВ.

Николай Константинов хаартыскаҕа түһэриитэ.