Саахымат федерациятын сурутуунан бэлэҕэ

Дьоҥҥо хаһыаттары, сурунааллары ааҕыыны көҕүлүүр инниттэн сыл аайы республика үрдүнэн бэчээккэ чэпчэтиилээх сурутуу тэриллэр. Ол иһигэр, спорка аналлаах «Дьулурҕан» сыһыарыылаах «Забота-Арчы» хаһыакка сурутуу көхтөөхтүк барар.

Бу көҕүлээһини өйөөн Саха Республикатын саахымакка федерациятын салалтата, саахыматы сайыннарыыга өҥөлөөх, өрүү инники күөҥҥэ сылдьар 12 киһиэхэ биһиги хаһыаппытын суруттаран, дьоһун бэлэх оҥордо. Онон Д.Н. Мосорин, П.С. Яковлев, С.А. Протодьяконов, М.Н. Ноева, А.П. Малышев, М.Н. Дьячковская, Р.З. Маппырова, Д.Д. Максимов, Л.П. Хантаева, А.А. Борисов, Н.А. Егоров, Ю.А. Мурзин – от ыйыттан саҕалаан «Забота-Арчы» хаһыаты дьиэлэригэр тутан ааҕар буолуохтара. Итиэннэ хаһыат ыытар үлэтигэр көхтөөхтүк кыттан, саахымат туһунан санааларын суруйалларыгар эрэнэбит.

Маннык үтүө холобуру көрдөрбүт СР Үүнэр көлүөнэҕэ анал фондатын генеральнай дириэктэрэ, саахымат федерациятын салайааччы Владимир Анатольевич Егоровка уонна фонда отделын начальнига Иван Евгениевич Сивцевкэ махталбытын тиэрдэбит!

Спорт атын да федерациялара, тэрилтэлэрэ Саахымат федерациятын үтүө холобурун батыһан, республикаҕа спорт туһунан соҕотоҕун бэчээттэнэн тахсар “Дьулурҕан” хаһыакка суруттараргытыгар ыҥырабыт.

Петр ПАВЛОВ.