Өрүү күүс-көмө, өйөбүл буолар баһылыкпытыгар – Махтал!

Тустуу биһигинэн аатырар Чурапчы сэлиэнньэтигэр улуу тренер Д.П. Коркин төрөөбүтэ 95 сылын көрсө Н.Н. Тарскай кэриэһигэр Саха Республикатын көҥүл тустууга чемпионата буолан ааста. Манна республика араас улуустарыттан, Саха сирин күүстээх бөҕөстөрө мустан күрэс былдьастылар.  

Ол курдук, биһиги, Сунтаар улууһуттан 19 бөҕөс буолан кыттыыны ыллыбыт. Хамаанда хомуллан, күүстээх сбору ааһан, 1000 км айаннаан, Чурапчыны буллубут. Тэрээhиннэрэ олус үчүгэй, күрэхтэһээччилэри автобус илдьэр-аҕалар, биһигини Чурапчытааҕы физическэй культура уонна спорт государственнай институтун бары өттүнэн хааччыллыылаах уопсайдарыгар олордубуттара, онон тымныы халлааҥҥа сатыы хаамтарбатылар.

Күрэхтэһиини Медиа пространства бэккэ сырдатта, блогердар да бааллар, “Саха” НВК, олохтоох телевидение, көрөөччү элбэҕэ түһүлгэни күүркэттэ.

Чемпионат саҕаламмытыгар Сунтаар улууһун баhылыга Анатолий Васильевич кэлэн хамаандаҕа өйөбүл тыллары этэн, кини тылыттан күүс ылан, уолаттар туох баалларынан, бэйэлэрин харыстаммакка киирсэн, Сунтаар улууһун хамаандатын 3-с бириистээх миэстэҕэ таһаардылар. Былырыын эмиэ үһүс миэстэни ылан, онтукайбытын чиҥэттибит.

Онон биһиги, Сунтаар тустууктара – өрүү биһиэхэ күүс-көмө, өйөбүл буолар улууспут баһылыгар Анатолий Васильевич Григорьевка “Дьулурҕан” хаһыат сайтын нөҥүө улахан махталбытын тириэрдэбит!

Санатан эттэххэ, Чурапчыга буолан ааспыт көҥүл тустууга Саха Республикатын 2023 сыллааҕы чемпионатыгар Сунтаар хамаандатыттан бэйэлэрин ыйааһыннарыгар Николай Охлопков, Денис Максимов иккис, Лев Павлов, Харысхал Григорьев, Александр Болуров, Дьулус Тотонов, Револий Самсонов, Владимир Данилов үһүс миэстэлэри ылары ситистилэр.

Владимир ДАНИЛОВ, Сунтаардааҕы оҕо спортивнай оскуолатын тренерэ.