Сүрүн сорук ситиһилиннэ, аны – Олимпиада!

// Арыйаан Тютрин – Олимпиадаҕа кыттар быраабы ылла!

Азербайджан киин куоратыгар Бакуга, аны сайын Парижка (Франция) буолар Олимпийскай оонньууларга сүүмэрдиир көҥүл тустууга Европа континенын күрэхтэһиитэ ыытыллан түмүктэннэ. Эрдэ иһитиннэрбиппит курдук, бу эппиэттээх түһүлгэҕэ саха тустууга кыһатын үс иитиллээччитэ кытынна.

Кинилэртэн Беларусь Республикатын чиэһин көмүскүүр Арыйаан Тютрин үчүгэй көрдөрүүлэннэ. Арыйаан бастакы эргииргэ Швейцарияттан Томас Эпп диэн бөҕөһү, хапсыһыы болдьоҕун иннинэ очукуонан ыраастык (10:0) кыайда. Иккис эргииргэ, кини утарсааччытынан немец Хорст Лер буолла. Санатан эттэххэ, бу бөҕөстөр 2021 сыллаахха аан дойду чемпионатыгар иккиэн пьедестал үһүс үктэлигэр тахсыбыттара. Бу күҥҥэ хайалара күүстээҕин быһаарсыыга, биһиги бөҕөспүт 10:6 ахсаанынан баһыйа тутта.

Онтон дьэ, финал аҥарыгар Европа чемпионатын үс төгүллээх призера, Токиотааҕы Олимпиадаҕа бэһис миэстэлээх Георгий Вангеловы (Болгария) кытта көрүстэ. Сүрдээх тыҥааһыннаахтык барбыт хапсыһыыга Арыйаан утарсааччытын бары өттүнэн баһыйа тутан 7:3 ахсаанынан эрэллээхтик кыайда. Итинэн Олимпиадаҕа кыттар путевканы ылла.

Манна даҕатан эттэххэ, бу күрэхтэһии – икки бастыҥы эрэ быһаарарын быһыытынан, бастакы уонна үһүс миэстэлэри былдьаһар финаллар ыытыллыбатылар.

Эмиэ 57 киилэҕэ кыттыбыт иккис киһибит – Европа чемпиона Владимир Егоров (Хотугу Македония) бастакы эргииргэ Францияттан кыттар чечен Ильман Мухтаровы бэрт кылгас бириэмэнэн 10:0 ахсаанынан хотто. Салгыы күрэхтэһиигэ кини грузин Роберт Дингашвилины кытта наһаа тыҥааһыннаахтык барбыт киирсиигэ 3:2 ахсаанынан баһыйа тутта. Кэлин биллибитинэн, бу хапсыһыыга уолбут эчэйии ылбыт. Онон, финал аҥарыгар – олимпийскай лицензия иһин тустууга көбүөр хаһаайына, бу иннинэ икки утарсааччытын нуулунан ыыппыт Алиаббас Рзазадены кытта киирсиитигэр дьиҥ кыаҕын туһаммакка, 3:4 ахсаанынан хотторон кэбистэ. Манна сыһыары тутан эттэххэ, Егоров чуолаан бу бөҕөһү Европа чемпионатын финалыгар кыайан турар.

Бу түһүлгэҕэ үһүс киһибит – Беларусь хас да төгүллээх чемпиона, Европа чемпионатын призера Ньургун Скрябин (65 кг) маҥнайгы эргииргэ турок Абдулла Топракка сабырыйтаран иһэн, биир түгэҥҥэ партерга охтороот, «кириэс» диэн албаска түбэһиннэрэн, очукуонан ыраас кыайыыны ситистэ. Иккис эргииргэ сэрэбиэй быһыытынан, түһүлгэ хаһаайына, сыыстарбат буоллахпына бу күрэхтэһии саамай улахан ааттаах-суоллаах бөҕөһө – икки төгүллээх олимпийскай призер, аан дойду 3, Европа 4 төгүллээх чемпиона Хаджи Алиевтыын көрүстэ.

Туораттан көрдөххө, хапсыһыы тэҥҥэ барда. Бөҕөстөр иккиэн, тустуу эйгэтигэр сааһыран эрэр, баай опыттаах бөҕөстөрүнэн биллэллэр. Онон туох баар сатабылларын, күүстэрин-уохтарын, мунньуммут үөрүйэхтэрин туһанан туһуннулар. Маныаха сүүһүнэн көрөөччүлэрин, сүгүрүйээччилэрин кыайыыга күөртүүр ыһыыларынан-хаһыыларынан доҕуһуоллатан, арыый түргэн хамсаныылааҕынан Алиев 4:2 ахсаанынан хотон таҕыста.

Дьэ, кылгастык уолаттарбыт тустууларын билиһиннэрдэххэ итинник.

Олимпийскай лицензиялары былдьаһар хапсыһыылар:

57 кг Алиаббас Рзазаде (Азербайджан) – Владимир Егоров (Хотугу Македония) 4:3

57 кг Арыйаан Тютрин (Беларусь) – Георгий Вангелов (Болгария) 7:3

65 кг Годердзи Дзебишвили (Грузия) – Максим Сакулцан (Молдова) 2:1

65 кг Хаджи Алиев (Азербайджан) – Ислам Дудаев (Албания) 6:3.

Тустуу диэн улахан сыралаах үлэ. Арыйаан Тютрин ол биир түһүмэҕин ситиһиилээхтик толордо диэххэ сөп. Бу кыһыны быһа былааннаах үлэни ыытан, этэргэ дылы, түбүктээх үлэтэ – түмүктээх буолла. Сүрүн сорук ситиһилиннэ, аны – Олимпиада! Түгэнинэн туһанан Арыйаан бастакы тренерэ Семен Гаврильевич Петухову, билигин дьарыктана сылдьар тренерэ Иван Иванович Дмитриеви эҕэрдэлиибит!

Билиҥҥи кэмҥэ биир тумус туттар бөҕөспүт Арыйаан Тютрин Олимпиадаҕа кыттар быраабы ылыыта – саха спордун, саха тустуутун биир ситиһиитинэн ааҕыллар. Аны кини иннигэр Парижка ситиһиилээхтик тустар сыал-сорук турар.

Петр ПАВЛОВ.