Сонуннар

Медведь турнирыттан 10 мэтээл!

Беларусь Республикатын киин куоратыгар Минскэйгэ, албан аатырбыт Александр Медведь бирииһигэр көҥүл тустууга үгэскэ кубулуйбут норуоттар икки ардыларынааҕы Гран-при турнир ыытыллан түмүктэннэ. Быйылгы түһүлгэҕэ Армения, Абхазия, Узбекистан, Бахрейн, Молдова, Казахстан, Македония, Россия уонна Беларусь бөҕөстөрө күөн көрүстүлэр.   

Манна, саха тустууга кыһатын иитиллээччилэрэ хаһааҥҥытааҕар даҕаны ситиһиилээхтик туһуннулар. Ол курдук, эр дьоҥҥо – 2 кыһыл көмүс, 3 үрүҥ көмүс, 4 боруонса, онтон дьахталларга 1 боруонса (Лилияна Рожина, 72 кг) мэтээли ылары ситистилэр.

Ньурба ыччата Александр Авелов кэнники кэмҥэ Саха сиригэр 61 киилэҕэ бастыҥ бөҕөс буолан эрэрин өссө төгүл көрдөрдө. Кини хаһан баҕарар кыайыыга дьулуурдаахтык тустар. Бу сырыыга биир да сыыһа-халты туттууну оҥорбокко, ыгылыйбакка туһунна. Быһаарыылаах хапсыһыыга Брянскайтан кыттар М.Себединовы 6:1 ахсаанынан эрэллээхтик кыайда. Бу ситиһии эдэр бөҕөскө инники кыайыыларга үктэл буоларыгар, санаата күүһүрэригэр баҕарабыт. Санатан эттэххэ, Авелов – Россия, Саха сирин үтүөлээх тренерэ Будимир Григорьевич Яковлев салалтатынан эрчиллэр. Биһиги киниэхэ сүрдээҕин эрэнэбит.

Сахаларга иккис кыһыл көмүс мэтээли, билиҥҥи кэмҥэ биир саамай опыттаах тустуукпут, Россия, Европа чемпионаттарын призера, норуоттар икки ардыларынааҕы кылаастаах спорт маастара, 33 саастаах Ньургун Скрябин аҕалла. Билэргит курдук Ньургун бастакы тренерэ – СР үтүөлээх тренерэ Гаврил Игнатьев, онтон билигин Беларуська, Жуматай Шубаев салалтанынан дьарыктанар.

Кини өскөтүн Беларусь Республикатын 4 төгүллээх чемпиона эбит буоллаҕына, ылан көрдөххө А.Медведь турнирыгар биирдэ даҕаны бастыы илигэ, 2-тэ иккис, 4-тэ үһүс миэстэ буолбута. Бу сырыыга уолбут дьэ кыайыы көтөллөннө. Минскэй көбүөрүгэр чахчы да сиппит-хоппут киирсиилэри көрдөрдө. Итинэн билигин даҕаны кыахтааҕын итэҕэттэ. Биир бэйэм ордук, финалга тахсар иһин киирсиигэ Россия чемпионатын призера, дагестанец А.Абдуллаевы 4:2 ахсаанынан кыайыытын астынным. Онтон финалга опыттаах киһи, көбүөр хаһаайынын быһыытынан барытын ааҕан-суоттаан, күүһүн, сэниэтин үллэрэн тустан, Харчилаваны 2:1 ахсаанынан хотто.

 Атын да уолаттарбыт бэйэлэрин кыахтарынан туһуннулар. Ол курдук, Алексей Копылов (57 кг), Олег Фомин (70 кг), Никита Хабаров (125 кг) – иккис, Андрей Бекренев (61 кг), Константин Капрынов (70 кг), Максим Толмачев (92 кг) уонна Эдуард Максимов (125 кг) – үһүс миэстэлэри ыллылар.

Кэнники кэмҥэ ыарахан ыйааһыҥҥа тустар уолаттарбыт эриэ-дэхси көрдөрүүнү ситиһэллэрэ киһини үөрдэр. Горнай ыччата Эдуард Максимов соторутааҕыта Дагестаҥҥа, М.Умаханов кэриэһигэр норуоттар икки ардыларынааҕы турнирга миэстэлэспитэ, аны Минскэйгэ үһүстээтэ. Кини хас да сыл тохтоон баран, быйылгыттан дьаныардаахтык дьарыктанан, тустуута тупсан иһэрэ харахха быраҕыллар. Салгыы өссө дьулуурдаахтык үлэлээтэҕинэ, кэскиллээҕин көрдөрдө диэхпин баҕарабын.

Өссө Андриан Ленскэй (79 кг) уонна Никита Софронов (92 кг) боруонса мэтээл иһин тустан хотторон кэбистилэр.

Түмүктээн эттэххэ, А.Медведь турнирыгар спортсменнарбыт ситиһиилээхтик кытыннылар. Онон мэтээлгэ тиксибит тустууктар тренердэригэр барыларыгар эҕэрдэ! Ситиһииттэн уоскуйбакка, бэйэ иннигэр өссө улахан ирдэбиллэри туруоран, аны тохсунньу бүтүүтэ Красноярскайга ыытыллар Иван Ярыгин кубогар ситиһиилээхтик кыттар сыал-сорук турар. Минскэйдээҕи турнирга кыттыыны онно бэлэмнэнии эрэ быһыытынан сыаналыахха наада. Ол аата, ким туга-ханныга, хаһан баҕарар буоларыныы – Ярыгин турнирын, Россия чемпионатын курдук сүрүн күрэхтэһиилэр түмүктэринэн биллиэҕэ.

Турнир түмүк көрдөрүүтэ:

57 кг: 1. Димчик Батомонкуев (Беларусь), 2. Алексей Копылов, 3. Хабиб Мехтиханов, Мурад Исламов (бары – Россия).

61 кг6 1. Александр Авелов, 2. Магомед Себединов (иккиэн – Россия), 3. Артем Мандрюков, Андрей Бекренев (иккиэн – Беларусь).

65 кг: 1. Ньургун Скрябин (Беларусь), 2. Даниил Харчилава, 3. Арипгаджияв Абдулаев, Магомед Тажудинов (үһүөн – Россия).

70 кг: 1. Азнаур Таваев, 2. Олег Фомин, 3. Константин Капрынов, Игорь Упхоев (бары – Россия).

74 кг: 1. Магомедхабиб Кадимагомедов (Беларусь), 2. Ильяс Бекбулатов (Узбекистан). 3. Ахмед Нурахмаев (Россия), Магомедрасул Аслуев (Бахрейн).

79 кг: 1. Хидир Сайпудинов (Бахрейн), 2. Касум Касумов (Россия), 3. Дмитрий Денисеня (Беларусь), Ахмед Манилов (Россия).

86 кг: 1. Асламбек Гварамия (Абхазия), 2. Магомеднаби Магомедов, 3. Арсен Балаян, Азрет Улимбашев (үһүөн – Россия).

92 кг6 1. Ламберт Харонов, 2. Омар Зияутдинов (иккиэн – Россия), 3. Ярослав Иодковскай (Беларусь), Максим Толмачев (Россия).

97 кг: 1. Магомедгаджи Нуров (Хотугу Македония), 2. Константин Пшеничников (Россия), 3. Алексей Пархоменко, Владислав Козлов (иккиэн – Беларусь).

125 кг: 1. Остап Пасенок. 2. Никита Хабаров, 3. Эдуард Максимов (үһүөн – Россия), Денис Хроменков (Беларусь).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

137670
Бүгүн : 134