Одинцово-2024: 57 киилэ сэрэбиэйин ырытыы

Москва уобалаһын Одинцово куоратыгар көҥүл тустууга Россия чемпионата саҕаланан бара турар. Бастакы ыйааһыҥҥа отут кыттааччы сэрэбиэйи ааспыт. Дагестанецтар Муса Мехтиханов уонна Ахмед Идрисов сэрэбиэйгэ бастакы уонна иккис рейтини ылан, үөһээ уонна аллараа бөлөхтөргө баһылыктарынан туруоруллубуттар.

Ити курдук, эмиэ инники көрдөрүүлэринэн көрөн, тувин Начын Монгуһу үөһэ, дагестанец Расул Гамзатовы аллараа бөлөххө киллэрбиттэр. Уоннааҕылар бары сэрэбиэй быһыытынан аттарыллан туруоруллубуттар. Биһигиттэн бу ыйааһыҥҥа биэс бөҕөс тустар.

Лев Павлов – Уйгулаан Иванов

Алексей Копылов – Начын Монгуш (Тыва)

Федор Постников – Артур Чебодаев (Красноярскай)

Любомир Ашеин – Кежик Седен (Тыва).

Сэрэбиэй кытаанах диэххэ сөп. Ол эрэн, бу хапсыһыыларга чопчу кыайыылаахтары этэ охсор ыарахан буолуо. Бары даҕаны тэҥ сыһа таһымнаах тустууктар. Барыта ким үчүгэйдик бэлэмнэммититтэн, ыйааһынын хайдах түһэрбититтэн, бүгүҥҥү күҥҥэ хайдах туруктааҕыттан тутулуктаах буолуоҕа. Бары да, кыайыыга оҥостон кэлбиттэрин быһыытынан, кыайыыга дьулуурдаахтар дии саныыбын.

Лев Павлов нэдиэлэ анараа өттүгэр Грознайга, 21-гэр диэри саастаахтарга Россия күрэхтэһиитигэр ситиһиилээхтик кыттан, балаҕан ыйыгар Испанияҕа буолар аан дойду түһүлгэтигэр кыттар быраабы ылла. Онон эдэр бөҕөс билигин үчүгэй тустар таһымыгар сылдьар диэн сыаналыыбын.

Манна даҕатан эттэххэ, бу саастаахтарга Европа күрэхтэһиитэ бэс ыйыгар Сербияҕа буолуохтаах. Онон Чечняҕа ситиһиилээхтик кыттыбыт уолаттарбыт бу күрэхтэһиилэргэ кытталларыгар эрэллээхпит. Биллэн турар, билигин барыта аан дойдуга политическай быһыы-майгы хайдаҕыттан тутулуктаах.

Уйгулаан Иванов бу ыйааһыҥҥа Бороҕоҥҥо ыытыллыбыт республика чемпиона. Киһи ахсаантан хайдах да бырахпат бөҕөһө. Эмиэ кыайардыы оҥостон, түгэни мүччү туппат гына оҥостон кэлбит буолуохтаах. Манна сыһыары тутан эттэххэ, Уйгулаан бу кыһыны быһа Белоруссияҕа, Арыйаан Тютриҥҥа спарринг-партнер быһыытынан сылдьыбытын, уолбут олимпийскай путевканы ылбытыгар өҥөлөөҕүн санатар тоҕоостоох.

Ханныгын да иһин, Павлов – Иванов тустуутун кыайыылааҕа салгыы күрэхтэһиигэ Пайзулаев (Дагестан) – Ондар (Тыва) пааратын кыайыылааҕын кытта көрсүөҕэ.

Кэнники күрэхтэһиилэр көрдөрбүттэринэн, билиҥҥи кэмҥэ 57 киилэҕэ биир бастыҥ бөҕөспүтүнэн Дальнай Востокка уонна «Байкал Опен» турнирга чемпионнаабыт Алексей Копылов буолар. Киниэхэ сүрдээҕин эрэнэбит. Сыыстарбат буоллахпына, Алексей хас да сыллааҕыта Минскэйгэ, А.Медведь бирииһигэр норуоттар икки ардыларынааҕы турнирга Начын Монгуһу кытта тустан турар. Онно олох тэбис-тэҥ киирсиигэ кыранан сабырыйтарбыта. Ол хотторууну улахан уруок оҥостубут буолуохтаах…

Уолаттарбыт олох, хахай хааннарын киллэрэн туран тусталларыгар баҕарабыт. Убайдара, олимпиецтар эппиттэрин курдук, хас биирдии хапсыһыыга туох баар кыахтарын, күүстэрин, дьулуурдарын ууран туран, олоххо бүтэһик киирсиигэ курдук хара ааныттан тустуу бүтүөр диэри тохтоон турбакка кимиилээхтик киирсиэхтээхтэр.

Федор Постников уонна Артур Чебодаев хаста да көрүстүлэр. Билиҥҥитэ Чебодаев сирэй көрсүүгэ кыайан иһэр. Ол гынан баран, Федор уонна кини хамаандата, Чебодаев күүстээх уонна мөлтөх өрүттэрин үчүгэйдик үөрэппит, ырыппыт буолуохтаахтар диэн бүк эрэнэбит. Бу сырыыга олох атыннык, кыайардыы оҥостон тустуохтаах. Ханнык баҕарар күрэхтэһии – бу тустуук уонна тренер үлэлэрин түмүгүн көрдөрөр түһүлгэ буолар. Дьэ, бу сырыыга ким хайдах бэлэмнэммитин көрүөхпүт.

Онтон Любомир Ашеин, мин санаабар тувинеһы кыайыахтаах.

Чэ, 57 киилэҕэ бастакы эргиирдэри кыратык сэгэтэн ырытан көрдөххө итинник. Бу ыйааһын бастыҥа, олимпийскай чемпион Заур Угуев уонна былырыыҥҥы чемпионат үрүҥ көмүс призера Артем Гобаев 61 кг тустар буолбуттар. Онон, атыттарга суол аһыллан биэрбитин, дьэ ким туһанар? Састаап тэҥ диэххэ сөп.

Чемпионат хаамыытын күннэтэ сырдатан иһиэхпит. “Дьулурҕан” сайтын, ютуб каналын, Телеграмҥа страницатын кэтээн көрө сылдьаргытыгар.

Хаһан баҕарар буоларыныы, уолаттарбытыгар ыалдьабыт. Ситиһиилээх тустууну баҕарабыт!

Петр ПАВЛОВ.