Бөҕөстөрбүт Миндиашвили турнирыгар кыттыахтара

Ахсынньы 21-24 күннэригэр Красноярскайга, Россия Үлэҕэ Геройа, ССРС үтүөлээх тренерэ Дмитрий Георгиевич Миндиашвили кэриэһигэр спортивнай тустууга Бүтүн Россиятааҕы турнир ыытыллар. Бу күрэхтэһии Россия спорка министиэристибэтин 2023 сыллааҕы үлэтин торумугар киллэриллэн, улахан суолта бэриллэн тэриллэр.

Күрэхтэһии дьахталларга уонна эр дьоҥҥо уоннуу ыйааһыҥҥа ыытыллар. Итиэннэ тохсунньу 24-28 күннэригэр эмиэ Красноярскайга буолуохтаах Иван Ярыгин Кубогар бэлэмнэнии, бастыҥнары талыы быһыытынан сыаналанар.

Тустуу ахсынньы 22 күнүгэр саҕаланан баран, сарсыныгар дьахталларга уонна эр дьоҥҥо 5-тии ыйааһыҥҥа кыайыылаахтар уонна призердар быһаарыллыахтара. Онтон нөҥүө күнүгэр, ол аата, ахсынньы 24 чыыһылатыгар хаалбыт биэстии ыйааһыннарга бастыҥнарынан кимнээх буолалларын билиэхпит.

Сайаапкатыттан көрдөххө, биһиги республикабытыттан эр дьоҥҥо маннык бөҕөстөр кыттарга бэлэмнэнэллэр:

57 кг Любомир Ашеин, Федор Постников, Уйгулаан Иванов.

61 кг Петр Константинов, Ньургун Терентьев, Александр Авелов.

65 кг Иван Потапов, Дьулусхан Тотонов.

70 кг Айсен Потапов, Олег Фомин, Петр Ксенофонтов.

74 кг Николай Сивцев.

79 кг Андриан Ленскэй, Василий Кириллин.

92 кг Никита Софронов, Алексей Ефимов (Красноярскай).

97 кг Максим Толмачев (Красноярскай).

125 кг Никита Хабаров, Эдуард Максимов.

Онтон дьахталлар тустууларыгар, соторутааҕыта Абакаҥҥа Бүтүн Россиятааҕы турнирга ситиһиилээхтик  кыттыбыт Александра Копылова (50 кг), Виолетта Махарова (55 кг), Кюндюнэ Борисова (57 кг) уонна Надежда Галдина (65 кг) киирсиэхтэрэ.

Спортсменнарбытыгар ситиһиилээх тустууну баҕарабыт уонна Красноярскайтан сэмээр үчүгэй сонуну кэтэһэбит.

«Дьулурҕан».