Сонуннар

Айаал Лазарев – Азия оонньуутун призера!

Кытай Ханчжоу куоратыгар Азия XIX сайыҥҥы спортивнай оонньууларын көҥүл тустууга күрэхтэһиитэ ыытыллан түмүктэннэ. Бу түһүлгэ саха тустууга кыһатын туһугар үөрүүлээх буолла.

Ыарахан ыйааһыҥҥа аан дойду таһымыгар үрдүк көрдөрүүлээх билиҥҥи кэмҥэ биир тумус туттар бөҕөспүт, Азия чемпиона, Аан дойду кубогын биирдиилээн бастыыр иһин күрэхтэһиитин боруонса призера, Кыргызстан Республикатын үтүөлээх маастара Айаал Лазарев – Азия оонньууларын боруонса мэтээлин хаһаайынынан буолла.

Сахаларга, “туох ханнык үһүстээх” диэн бэргэн этии баар. Ол туолла диэххэ сөп. Айаал бу иннинэ 2010 сыллаахха Гуанжчоуга (Кытай) ахсыс, 2014 сыллаахха Инчхоҥҥа (Корея) тохсус миэстэлэргэ тиксибитэ. Онтон бу, үһүс сырыытыгар БОРУОНСА мэтээллэннэ. Эҕэрдэлиибит!

Айаал тустуутун видеотын манна https://www.youtube.com/channel/UCdQWiPUliiKpPOVV3JKN.. көрүөххүтүн сөп.

Манна кыратык быһааран биэрдэххэ, Азия оонньуулара – түөрт сылга биирдэ ыытыллар Азия континенын Олимпийскай оонньуута диэххэ сөп. Бу иннинэ саха тустууктарыттан Леонид Спиридонов 2010 сыллаахха 66 киилэҕэ боруонса мэтээли бастакынан ылан турар. Аны кини көрдөрүүтүн Айаал Лазарев хатылаата.

Онон бу түһүлгэ улахан суолталаах диэхпин баҕарабын. Сорох дойдулар Азия оонньууларын – көҥүл тустууга аан дойду чемпионатыттан үрдүктүк туталлар. Онно бастаабыт, миэстэлэспит спортсменнарын үрдүктүк туталлар, сыаналыыллар. Тоҕо диэтэххэ, тустаах дьон үлэлэрин түмүгэ буоллаҕа.

Айаал тустубут 125 кг ыйааһыныгар барыта 15 бөҕөс күөн көрсүбүтэ. Биир дойдулаахпыт бастаан индус Сумиты очконан ыраастык кыайан (10:0), күрэхтэһиини кыайыынынан саҕалаабыта. Онтон салгыы тустууга аан дойду чемпионатын икки төгүллээх призера, Азия быйылгы чемпиона монгол Лхагварел Мунхтурга 0:6 ахсаанынан хотторон кэбиспитэ.

Онон оонньуулар боруонса мэтээллэрин ким ыларын быһаарсыыга узбек Хасанбой Рахимовы кытта тустар буолбута. Бу хапсыһыыга Айаал утарсааччытыгар бэйэтин тустуутун соҥноон, наар үөһэттэн тутуһан тустан, бэйэтин сөбүлээн туттар хамсаныыларыгар түбэһиннэрэн, өссө бастаан киһитин мостикка тута сырытта. Ол да буоллар, тустуу бүтэрэ мүнүүтэ иһинэн бириэмэҕэ 2:6 ахсаанынан сабырыйтаран иһэн, санаатын түһэрбэккэ, бүтэһиккэ диэри ньоҕойдоһон киирсэн, син биир сөбүлүүр хамсаныытыгар түбэһиннэрэн охтороот, тута накатка эргитэн ахсааны 6:6 оҥордо. Онон быраабыла быһыытынан, очукуону бүтэһигинэн ылбытын быһыытынан кыайыылааҕынан таҕыста.

Ол да буоллар, узбектар, кэнники очукуо суоҕа диэн мөккүһэн көрдүлэр да, судьуйалар кинилэр этиилэрин ылымматылар. Барыта быраабыла быһыытынан буолла. Онон түмүккэ Айаал 7:6 ахсаанынан кыайан таҕыста. Маныаха бастатан туран, кини бу хапсыһыыга кытаанах булгуруйбат санаатын, характерын көрдөрдө диэххэ сөп.

Итинэн Айаал Лазарев – Азия оонньууларын боруонса призёрунан буолла. Бу ситиһиитинэн кинини тус бэйэтин, тренердэрин – РФ уонна СР үтүөлээх тренерэ Иван Николаевич Сивцеви, СР үтүөлээх тренерэ Иннокентий Семенович Кочкины уонна бүттүүн Саха сирин олохтоохторун, билиҥҥи ыарахан кэмҥэ дьоллоох түгэни бэлэхтээбитинэн эҕэрдэлиибит! Итиэннэ олимпиец аатын ылыа диэн эрэнэбит.

Петр ПАВЛОВ.    

Добавить комментарий

Ваш адрес email не будет опубликован. Обязательные поля помечены *

176537
Бүгүн : 103