Семен Черноградскай бирииһигэр

Муус устар 7 күнүгэр Бороҕоҥҥо, аатырбыт Мүрү алааска – Cахабыт сирин уонна Россия хайыһарын суолугар 15 ситиһиитэ 55 сыл устата хатыламматах хайыһардьыт, ССРС спордун маастара, Российскай Федерация физическэй култуураҕа уонна спорка туйгуна, Саха Республикатын физическэй култуураҕа уонна спорка үтүөлээх үлэһитэ, Уус Алдан улууһун бочуоттаах гражданина Семен Ильич Черноградскай бирииһигэр республикатааҕы күрэхтэһии ыытылынна.

Күрэхтэһиигэ Мирнэйтэн, Алдантан, Ленскэйтэн, Мэҥэ Хаҥаластан, Горнайтан, Амматтан, Чурапчыттан, Хатастан, Хаҥаластан, Намтан, Дьокуускайтан, Нерюнгриттэн хайыһардьыттар кэлбиттэр. Аан дойду чемпионнара Мария Бандерова, Николай Захаров кэлэн кыттан, күрэхтэһии таһымын үрдэттилэр.

Кыттааччылар, Семен Ильич күрэхтэһиитэ бэрт үчүгэй тэрээһиннээх буолла диэн сыаналыыллар уонна улуус спорка салайааччыларыгар, бу күрэхтэһиини тэрийээччилэргэ махтаналлар. Ол курдук, бэтэрээн хайыһардьыт бөҕө кэлбит. Бириис бөҕө туттарыллынна. Сүрүн бирииһи – убаһаны Уус Алдантан Лоокуут Колодезников ылла. Аны хас дистанция аайы бастаабыт, иккис-үһүс буолбут спортсменнарга мэтээллэр, грамоталар…

Хайыһар суолугар барыта 80 аҕам саастаах киһи таҕыста. Кинилэртэн үгүс аҥардара «Чысхаан» бөлөҕүн хайыһардьыттара.

Барыта 18 бөлөҕүнэн хайдыһан күрэхтэстилэр. Күрэхтэһээччилэр хайыһар трассатын хайҕаатылар. Үс иһигэр киирбиттэр мэтээли таһынан сыаналаах бириистэри ылан, үөрэн-көтөн тарҕастылар.

«Дьулурҕан».