Күрэхтэһиини спорт маастардара киэргэттилэр

Күөрэлээххэ икки сылга биирдэ ыытыллар спортивнай тэрээһин үрдүк таһымҥа барда. Ол курдук, үстэ быыбарданан, биир дойдулаахтарын итэҕэллэрин эрэллэрин ылбыт Валентин Ковров сырдык аатыгар троеборье күрэхтэһиитэ төрдүс төгүлүн ыытылынна.

Бастыҥ ааты былдьаһа Ньурбаттан, Өймөкөөнтөн, Үөһээ Дьааҥыттан, Чурапчыттан, Уус Алдантан, Амматтан, Горнайтан 10 эр бэрдэ сүрүн бириис иһин теннискэ, хапсаҕайга, мас тардыһыытыгар күөн көрүстэ.

Уолаттар ортолоругар Россия, Саха сирин спордун маастардара баара күрэхтэһиини олус сытыырхатта.

Биирдиилээн көрүҥнэргэ остуол тенниһигэр: 1. Сулейман Рустамов (Өймөкөөн), 2. Айаал Николаев (Ньурба), 3. Александр Потапов (Чурапчы).

Хапсаҕайга: 1. Петр Прудецкай (Үөһээ Дьааҥы), 2. Альберт Николаев (Ньурба), 3. Савва Копырин (Уус Алдан).

Мас тардыһыытыгар: 1. Максим Борохин (Амма), 2. Савва Копырин, 3. Сулейман Рустамов.

Уопсай түмүккэ, муҥутуур кыайыылаах үрдүк аатын Сулейман Рустамов ылла.

Валентин Филиппович дьиэ кэргэнэ, доҕотторо спорду көҕүлүүр, уолаттары өйүүр туһуттан, бу күрэхтэһиигэ анал бириистэри олохтоотулар. Ол курдук, Петр Прудецкай иккис, Максим Борохин үһүс миэстэҕэ тахсан, бэркэ астыннылар.

Кыайыылаахтарга уонна призердарга Валентин Ковров кэргэнэ Сардаана Егоровна, уола Валентин, олохтоох дьаһалта баһылыга Алексей Петров, СГУ-га үөрэммит табаарыстарын аатыттан Дмитрий Титов, Михаил Уйгуров сыаналаах бириистэр туттардылар.

Эдэр кэскиллээх, бэйэлэрин киирсиилэринэн үчүгэй өйдөбүлү хаалларбыт Харитон Семенов, Уйусхан Максимов, Айаал Николаев, кыттааччылартан аҕа саастаах Владимир Татаринов илии тутурдаах, өттүк харалаах бардылар.

Кировскай орто оскуолатын 1983 с. выпускниктара истиҥник саныыр доҕордорун туһунан ахтан-санаан ыллылар, бастыҥ спортсменнар ситиһиилэрин сэмэй бэлэҕинэн сыаналаатылар.

Васильевтар дьиэ кэргэн, уруу-аймах аатыттан кылаабынай судьуйа Александр Жирков Харитон Семеновы, Владимир Татариновы анал бирииһинэн наҕараадалаата.

Спортсменнар күрэхтэһиини олус сэҥээрдилэр. Остуол тенниһин көрүҥэ баара многоборьенан дьарыктанар дьоҥҥо ураты, сонун балаһыанньаны үөскэтэр диэн бэлиэтээтиилэр.

Сулейман Рустамов Күөрэлээххэ кэлиэн иннинэ спорт ити көрүҥэр улахан суолта ууран эрчиллибитэ туһалаабытын эттэ. Онон күрэхтэһии олус табылынна.

Кэлэр өттүгэр өссө үрдүк таһымҥа ыытарга үлэлэһиэхпит диэн тэрийээччилэр эрэннэрдилэр.

Вячеслав Алексеев.

Горнай.