Сонуннар

Виктор Яковлев Россия боруонса призера

Россия спортивнай тустууга чемпионатын иккис күнүгэр – эр дьоҥҥо үс, дьахталларга түөрт ыйааһыҥҥа бириистээх миэстэлэргэ кимнээх тиксэллэрин быһаарар хапсыһыылар ыытылыннылар. Онуоха саха тустууга кыһатын икки иитиллээччитэ дьэ, кэтэһиилээх мэтээллэри ылары ситистилэр.

Эр дьоҥҥо 61 киилэҕэ эдэр бөҕөс Виктор Яковлев сүрдээҕин үөртэ да, соһутта даҕаны. Улахан дьоҥҥо Россия чемпионатыгар аан бастаан сүрэхтэнээт – долгуйан, симиктэн хаалбакка, кимтэн да толлубакка, туох баар кыаҕын туһанан туһунна.

Виктор «уоскутар» бөлөххө киирэн бэрт кылгас кэмҥэ, бэйэтинээҕэр опыттаах, саастаах үс утарсааччытын утуу-субуу кыайталаата. Итинэн сындалыйбат сындааһыннааҕын, кыайыыга дьулуурдааҕын көрдөрдө. Ол курдук, тоҕоостоох кэмҥэ төлө биэрэн хайдах баҕарар албастаан түһэртиир баай техникалааҕын, наада буоллаҕына – хапсыһыы хаамыытын барытын көрө-билэ сылдьан сөптөөх тактиканы тутуһарын бэлиэтиэххэ сөп. Ити барыта кини тренерин баай опыта, сүбэтэ-амата дии саныыбын.

Онтон чемпионат боруонса мэтээлин иһин тустууга биир дойдулааҕа Яков Павловы 2:1 ахсаанынан хотон, Виктор Яковлев Россия чемпионатын боруонса мэтээлинэн наҕараадаланна.

Манна сыһыары тутан эттэххэ, Виктор Эдьигээнтэн, биһиги бастакы олимпийскай чемпиоммут Роман Дмитриев дойдутуттан төрүттээх, сааһа 22-тэ. Быйыл кыһын Бурятияҕа буолбут, 23-гэр диэри саастаахтарга Дальнай Восток федеральнай уокуругар чаҕылхайдык тустан бастаабыта. Кини – Саха сирин үтүөлээх тренерэ Николай Николаевич Рожин салалтатынан дьарыктанар.

PS: Виктор Яковлев тустууларын “Дьулурҕан” телеграмҥа страницатыгар уонна ютуб каналыгар көрүөххүтүн сөп.

Өссө бу күн дьахталлар тустууларыгар 59 киилэҕэ Евгения Огородникова (хаартыскаҕа уҥаттан иккис) үһүс бириистээх миэстэ иһин тустууга утарсааччытын 3:1 ахсаанынан кыайыыны ситиһэн, боруонса мэтээлинэн наҕараадаланна. Манна даҕатан эттэххэ, Евгения бэйэтэ Томпо улууһуттан төрүттээх, тренерэ – РФ уонна СР үтүөлээх тренерэ Ким Колодезников.

Онон, Россия спортивнай тустууга чемпионатын бастакы финалларын түмүгүнэн Саха сирин хамаандата икки боруонса мэтээллэннэ. Чемпионат салҕанар, өссө да мэтээллэри эрэнэ кэтэһэбит!

Россия чемпионатыттан мэтээли аҕалбыт Евгения Огородникованы уонна Виктор Яковлевы, кинилэр тренердэрин, бу ситиһиигэ туох баар сыһыаннаах дьону барыларын эҕэрдэлиибит! Ситиһиллибиттэн уоскуйан хаалбакка, улаханнык дарбаммакка, салгыы улахан сыал-сорук туруорунан дьаныардаахтык дьарыктаналларыгар баҕарабыт.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

196899
Бүгүн : 272