ДВФУо-2024: Көбүөргэ ыҥырыллаллар…

Олунньу 17 күнүгэр субуотаҕа Аллараа Бэстээххэ «Парус» спортивнай комплекска көҥүл тустууга Дальнай Восток федеральнай уокуругун чемпионата ыытыллар. Икки көбүөрүнэн эр дьоҥҥо уонна дьахталларга 6 регионтан барыта 113 спортсмен күөн көрсүөҕэ. Кинилэртэн бастыҥнара Россия чемпионатыгар кыттар быраабы ылыаҕа

Эр дьоҥҥо күрэхтэһии ыйааһыннарынан кыттааччылары билиһиннэрдэххэ маннык:

57 кг – 15 кыттааччы баар, итинтэн 13 бэйэбит уолаттарбыт уонна 2 бурят (Шагдуров уонна Данжалов). Лев Павловы уонна Алексей Копыловы бөлөхтөр баһылыктарынан талбыттар.

Лев Павлов бөлөҕөр – Любомир Ашеин, Дархан Игнатьев, Уйгулан Иванов бааллар.

Онтон Алексей Копылов бөлөҕөр – Николай Захаров, Петр Адамов, Федор Постников.

61 кг – 16 кыттааччы сэрэбиэйи ааспыт. Манна Александр Авеловы уонна Петр Константиновы араарбыттар. Бу ыйааһыҥҥа Саха сирэ – Бурятия киирсиилэрэ буолар. Авелов өртүгэр буряттартан Борогшонов уонна Балжинимаев бааллар. Ону тэҥэ Михаил Иванов, Валентин Бурнашев бааллар.

Онтон Петр Константинов өртүгэр – буряттартан Дамдинов уонна Мункуев бааллар. Уонна бэйэтин уолаттара Виктор Яковлев, Ньургун Терентьев күөн көрсөллөр.

65 кг (14 кыттааччы). Бу ыйааһыҥҥа Саха сириттэн 11 киһи уонна 3 бөҕөс Бурятияттан сэрэбиэйи ааспыттар. Ол курдук, Дьулусхан Тотоновы уонна Игорь Матвеевы – үөһээ уонна аллараа бөлөхтөргө араарбыттар. Тотонов бөлөҕөр бурят Жигзымаев уонна Александр Иванов уонна Андрей Мидловец бааллар.

Онтон Матвеев өртүгэр сэрэйдэххэ, буряттар Баясхолонов, Шарастепанов уонна А.Болуров бастакы эргиири ааһаллара буолуо. Манна даҕатан эттэххэ, эрдэ сайаапкаҕа суруллубут бырааттыы Баяндуевтар уонна Балуевтар тоҕо эрэ сэрэбиэйи ааспатахтар.

70 кг – 11 кыттааччы. Күүстээхтэринэн Олег Фомины уонна Владимир Бояновскайы ааттаабыттар. Фомин сүрүн утарсааччытынан Албан Аввакумов уонна бурят Б.Цыренов буолаллара буолуо. Онтон Бояновскай бөлөххө ким бастыырын бурят И.Упхоевы кытта быһаарсара буолуо.

74 кг (9 кыттааччы). Манна Иннокентий Бабаранов – Н.Сивцев/А.Хатамов (Приморскай кыраай) уонна А.Никитин/Ц.Цыденов (Бурятия) паараларын кыайыылаахтара сүрүн миэстэ иһин тустуохтара.

Иккис бөлөххө Станислав Свинобоев – А.Захаров, А.Румянцев – С.Гармаев (Бурятия) пааралара көрсөллөр.

79 кг – 7 кыттааччы. Манна мин санаабар, «А» бөлөхтөн Василий Кириллин, «Б» бөлөхтөн Тумэн Бодиев (Бурятия) финалга көрсүөхтэрин сөп.

86 кг – 9 кыттааччы. Бастакы бөлөххө Андриан Ленскэй бурят Елбаскины кытта тустуута быһаарыылаах буолуоҕа. Өссө манна Еврейскэй автономнай уокуруктан Лапаев, Хабаровскайтан Рамазанов бааллар. Иккис бөлөххө, сэрэйдэххэ бурят Шадапов уонна кылгас тохтобул кэнниттэн көбүөргэ иккистээн эргиллибит норуоттар икки ардыларынааҕы кылаастаах спорт маастара Герман Устинов финалга ким тахсарын быһаарсаллара буолуо.

92 кг эмиэ 9-лар. Манна сылыктааһын быһыытынан, Никита Софронов уонна бурят Эрхитуев финалга көрсүөхтэрин сөп. Онтон үһүс миэстэҕэ Д.Калачев, Н.Константинов тахсыахтарын сөп.

97 кг – 5 кыттааччы эргиир систиэмэтинэн тустуохтара: Ньургун Сергин, Айсен Копырин (Саха сирэ), А.Елбаскин (Бурятия), Д.Шевцов (Приморскай кыраай), М.Лубянецкай (Амурскай уобалас). Онуоха биһиги Ньургун Сергиҥҥэ улаханнык эрэнэбит.

125 кг (8 кыттааччы). Манна эрдэ сайаапкаҕа биһигиттэн Ньургун Чукров эрэ баар курдуга, кэлин түгэҥҥэ өссө Э.Максимов, И.Алексеев эбиллибиттэр. Чукров иккис бөлөххө тута Балдан Цыжиповтыын тустар.

Дьэ, ыйааһыннарынан кылгас билиһиннэрии кэнниттэн ааҕан, ырытан көрдөххө – 57, 65, 70, 74, 92, 97 кг биһиги бөҕөстөрбүт үчүгэй курдуктар. Чэ бээ, көбүөр көрдөрүө.

Күрэхтэһии биир күнүнэн түмүктэнэр.

Петр ПАВЛОВ.