Каспийскай-2023: Севиль Назарова үһүс миэстэҕэ таҕыста

Дагестаҥҥа, дьахталларга уонна эр дьоҥҥо Россия көҥүл тустууга чемпионата үгэннээн ыытылла турар. Быйылгы чемпионат маннык, дьахталлары уонна эр дьону биир сиргэ түмэн дойду түһүлгэтэ тэриллибитинэн уратылаах. Россия тустууга историятыгар бастакы диэххэ сөп.

Дьэ, саха тустуутун таптааччылар, бэриниилээх ыалдьааччылар чемпионат үһүс күнүгэр харахпыт уутун сотуннубут. Билигин Саха сирин аатыттан кыттар, Чурапчытааҕы физическэй култуура уонна спорт институтугар үөрэнэр Севиль Назарова дьахталлар тустууларыгар 57 киилэҕэ үһүс бириистээх миэстэ иһин киирсиигэ Мария Бузарованы (Москва) ыраастык кыайан, чемпионат боруонса мэтээлин хаһаайынынан буолла.

Манан Севили уонна кини тренерэ Ким Колодезниковы эҕэрдэлиибит!

Бэҕэһээҥҥи тустууну билиһиннэрдэххэ, 92 киилэҕэ тустубут Ньургун Сергин уонна Никита Софронов хотторон кэбистилэр.

Аны бүгүн, бэс ыйын 23 күнүгэр түөрт спортсмеммыт кыттыаҕа. Ол курдук, 79 кг Василий Кириллин көбүөр хаһаайына, бу ыйааһын бастыҥа, дагестанец Ахмед Усмановы кытта тустуоҕа. Ити курдук, сэрэбиэй быһыытынан Максим Толмачев (97 кг) красноярец Игорь Овсянниковтыын, оттон Никита Хабаров (125 кг) – керемовчанин Павел Кривцовтуун киирсиэхтэрэ. Ону тэҥэ бүгүн дьахталлар тустууларыгар Лилиана Рожина (72 кг) көбүөргэ тахсыаҕа.

Бырагыраама быһыытынан чемпионат бүгүҥҥү хапсыһыылара Дьокуускай бириэмэтинэн 17:00 чаастан саҕаланаллар.

Эр дьоҥҥо бэҕэһээҥҥи финаллар түмүктэрэ:

61 кг: 1. Абасгаджи Магомедов, 2. Муслим Мехтиханов, 3. Динислам Тахтаров (үһүөн Дагестан), 3. Алик Хадарцев (ХМАО).

74 кг: 1. Чермен Валиев (РСО-Алания), 2. Тимур Бижоев (КБР), 3. Давид Баев (ХМАО), 3. Магома Дибиргаджиев (Дагестан).

Бүгүҥҥү финалларга көрсүөхтэрэ:

86 кг: Аманула Гаджимагомедов (Дагестан) – Арслан Багаев (Хотугу Осетия)

92 кг: Тажудин Мухтаров (Дагестан) – Владислав Валиев (Хотугу Осетия).

PS: Чемпионат биирдиилээн хапсыһыыларын Дьулурҕан хаһыат ютуб каналыгар көрүөххүтүн сөп.

«Дьулурҕан».