Спартакиада үөрүүлээхтик аһылынна

Бүгүн Алдан куорат спорка оскуолатын стадионугар Саха сирин спорт кыһыҥҥы көрүҥнэригэр V спартакиадатын үөрүүлээхтик аһыы тэрээһинэ буолла. Стадион киһи сургэтин көтөҕөрдүү киэргэтиллибит. Көрөөччүлэр толору мустан, бэлиэ түгэн дьоллоох туоһуларынан буоллулар.

Үөрүүлээх аһыллыы “Көмүс Алдан” диэн музыкальнай дьүһүйүүнэн саҕаланна. Төрүт олохтоох омук таҥастаах ыччаттар тахсан, үҥкүүлээн көрдөрдүлэр.

Стадион сүрүн түһүлгэтигэр Саха Республикатын Правительствотын председателин солбуйааччы, спартакиада тэрийэр хамыыһыйатын салайааччы Сергей Местников, Алдан оройуонун баһылыга Александр Шестопалов, Нерюнгри оройуонун баһылыга Роман Щегельняк, СР физическэй култуураҕа уонна спорка министрэ Леонид Спиридонов, СР култуураҕа уонна духуобунай сайдыыга министрэ Афанасий Ноев, олимпийскай чемпионнар Ольга Зайцева, Никита Крюков тахсан, бэйэлэрин эҕэрдэлэрин эттилэр.

Спартакиада үөрүүлээхтик аһыллыбытын уруйдаан ылбаҕай ырыа ылланна, имигэс үҥкүү битийдэ.

Тэрээһиҥҥэ Алдан оройуонун спордунан үлүһүйэн дьарыктанар дьиэ кэргэттэрэ хаамсан киириилэрин көрөөччүлэр эҕэрдэлии көрүстүлэр. Дьэ онтон хамаандалар сэлэлээн хааман киирдилэр. Барыта 28 хамаанда спортсменнара, салайааччылара, тренердэрэ – бэйэлэрин улуустарын, куораттарын ааттара суруллуулаах кэрэ көстүүлээх, араас өҥнөөх анал таҥастаах оҥостон кэлбиттэрэ, спартакиаданы киэргэттэ, этэргэ дылы, Эдэр саас, Дьулуур, Эйэ санааларын күөдьүттүлэр.

Хаһан баҕарар маннык тэрээһиҥҥэ буоларыныы, спортсменнар ааттарыттан андаҕар тылы Россия күрэхтэһиитин призера, хайыһардьыт Алексей Распутин, судьуйалар ааттарыттан – спартакиада сүрүн судьуйата Альберт Трофимов эттилэр.

Дьэ, ол кэнниттэн Саха сирин спорт кыһыҥҥы көрүҥнэригэр V спартакиадатын уота, спорт кыһыҥҥы көрүҥнэрин бастыҥ спортсменнарын бэйэ-бэйэлэригэр бэрсиилэринэн, стадион хоту өттүгэр турар факелга уматылынна уматылынна, күрэхтэһии былааҕа эмиэ онно көтөҕүлүннэ.

Алдан уонна Нерюнгри куораттарга спорт уон көрүҥэр күрэхтэһиилэр кулун тутар 30 күнүгэр диэри салҕанан барыахтара.

Петр ПАВЛОВ.

Ааптар хаартыскаҕа түһэриитэ.