Кинилэр Екатеринбург көбүөрүгэр тахсыахтара

Билигин Екатеринбург куоракка Студеннар спортарын норуоттар икки ардыларынааҕы фестиваля үгэннээн ыытылла турар. Бу иннинэ иһитиннэрбиппит курдук, бу улахан таһымнаах күрэхтэһии син биир Студеннар аан дойдутааҕы спортивнай оонньууларыгар – Универсиадаҕа тэҥнэнэр.

Екатеринбурга аан дойду араас дойдуларыттан спортсменнар кэлэннэр, спорт 14 көрүҥэр күрэхтэһэ сылдьаллар. Холобур, гректии-римнии тустууга Армения, Азербайджан, Афганистан, Венесуэла, Беларусь, Иран, Казахстан, Кыргызстан, Сербия уонна Россия дойдуларын бөҕөстөрө күөн көрсүбүттэрэ. Онон сарсыҥҥыттан саҕаланар эр дьон көҥүл тустууга күрэхтэһиитин састааба даҕаны күүстээх буолара күүтүллэр. Россия, фестивалы бэлэмнээн уонна тэрийэн ыытарын быһыытынан, биир ыйааһыҥҥа хас эмэ бөҕөһү киллэрэрэ көҥүл.

Ол курдук, биһигиттэн – М.К. Аммосов аатынан Хотугулу Илиҥҥи федеральнай университеттан – Алексей Копылов (57 кг), Александр Авелов (61 кг), Александр Иванов (65 кг), Станислав Свинобоев (74 кг), Никита Софронов (92 кг), Максим Толмачев (97 кг), Никита Хабаров (125 кг), онтон Чурапчытааҕы физическэй культура уонна спорт институтуттан – Любомир Ашеин (57 кг), Ньургун Терентьев (61 кг), Владимир Бояновскай (70 кг) Россия хамаандатын аатыттан тустуохтара.

Программа быһыытынан сарсын бары ыйааһыннарга финалистар биллиэхтээхтэр. Онтон кыайыылаахтарынан кимнээх буолбуттарын өйүүн билиэхпит.

Уолаттарбытыгар ситиһиилээх тустууну баҕарабыт!

«Дьулурҕан».