«Азия оҕолоро» оонньуу уота уматылынна

«Азия оҕолоро» норуоттар икки ардыларынааҕы VIII спортивнай оонньуулар саҕаланаллара оруобуна 100 хонугун иннинэ “Өлүөнэ очуостара” национальнай паарка тэллэҕэр, оонньуулар уоттарын уматыы сиэрэ-туома тэрилиннэ. Бу тэрээһин – өбүгэлэрбит үгэстэригэр ытыктабыллаахтык сыһыаннаһыы, сомоҕолоһуу уонна эйэлээх буолуу бэлиэтэ буолла.

Урукку сылларга оонньуу уота сүрүннээн Дьааҥы Киһилээх хайатыгар саҕыллыбыт эбит буоллаҕына, быйылгы маннык тэрээһин, «Азия оҕолоро» оонньууну төрүттээбит Саха Республикатын бастакы президенэ Михаил Ефимович Николаев төрөөбүт дойдутугар – Хаҥалас улууһун сиригэр-уотугар, чопчулаан эттэххэ, «Өлүөнэ очуостара» национальнай пааркаҕа, ытык очуос таас хайа анныларыгар, хаһан баҕарар буоларыныы, алгысчыт былыргылыы, чокуур таастан уоту саҕыытыттан уматылынна. Ол уот анал иһиккэ угуллан, эстафетаҕа айанныа.

Түөрт сылга биирдэ ыытыллар улахан таһымнаах оонньуу уотун уматыы кэрэ бэлиэ түгэнигэр, Өлүөнэ очуостарыгар сүүһүнэн киһи ыраахтан чугастан тоҕуоруста. Кинилэр бары «Азия оҕолоро» быйылгы оонньуу ситиһиилээхтик, өрө күүрүүлээхтик, үрдүк таһымнаахтык ыытылларыгар баҕараллара саарбахтаммат. Ол иһин үөрүүлэрин тэҥҥэ үллэстээри, бэлиэ түгэни илэ харахтарынан көрөөрү күргүөмүнэн көхтөөхтүк муһуннулар.

Үөрүүлээх тэрээһин бэлиэ түгэнинэн, Өлүөнэ очуостарын тэллэҕэр оҥоһуллубут анал хоккейдыыр кортка албан аатырбыт спортсменнар кыттыылаах табаарыстыы көрсүһүү буолла.

Кэрэ бэлиэ түгэҥҥэ Саха Республикатын Ил Дархана Айсен Николаев, Россия Олимпийскай комитетын президенэ Станислав Поздняков, албан аатырбыт хоккеист, олимпийскай чемпион Вячеслав Фетисов, «Азия оҕолоро» оонньуу норуоттар икки ардыларынааҕы комитетын президенэ Владимир Максимов сүрүн түһүлгэҕэ тахсан, көрөөччүлэри эҕэрдэлээтилэр. Оонньуулар ситиһиилээхтик тэриллэн ыытылларыгар баҕардылар.

Мантан ыла, «Азия оҕолоро» оонньуу уота эстафета быһыытынан Саха сирин бары улуустарын кэрийэн, быйылгы сылга биһиэхэ саамай улахан таһымнаах күрэхтэһии ыытылларын, тэриллэрин дьоҥҥо-сэргэҕэ киэҥник иһитиннэриэ уонна биллэриэ. Итиэннэ үс ый кэриҥэ кэминэн – бэс ыйын 26 күнүгэр «Туймаада» стадиоҥҥа, оонньуулары үөрүүлээхтик аһыы түгэнигэр аҕалыллыа. Эстафетаҕа барыта 550 киһи кыттара күүтүллэр, кинилэр 37000 км сиргэ уоту сырытыннарыахтара.

Санатан эттэххэ, «Азия оҕолоро» норуоттар икки ардыларынааҕы VIII спортивнай оонньуулар быйыл сайын бэс ыйын 25 – от ыйын 7 күннэригэр Дьокуускай куоракка ыытыллаллар. Онно 16-гар диэри саастаах эдэр оҕолор спорт 24 көрүҥэр күөн көрсүөхтэрэ.

Петр ПАВЛОВ.

Ааптар хаартыскаҕа түһэриилэрэ.