Бухарест-2024: Россия хамаандатын састааба быһаарылынна

Олунньу 16-18 күннэригэр Румыния киин куоратыгар Бухарестка көҥүл тустууга Европа чемпионата ыытыллар. Бу чемпионакка Хаджимурат Гацалов кылаабынай тренердээх Россия хамаандатын састааба быһаарылынна.

Хамаанда састаабын быһаарыыга 65 киилэҕэ, соторутааҕыта Красноярскайга ыытыллыбыт Иван Ярыгин Кубогын кыайыылааҕа Гаджимурад Рашидов уонна Россия чемпиона, аан дойду чемпионатын призера Шамиль Мамедов икки ардыларыгар хонтуруоллуур хапсыһыы тэрилиннэ. Билэргит курдук, Мамедов эчэйиилээх буолан Ярыгин Кубогын көтүппүтэ. Дьэ онон, ким бу күҥҥэ күүстээҕин быһаарыы ирдэммитэ.

Бу, Новогорскайга, Россия сүүмэрдэммит хамаандатын Европа чемпионатын иннинээҕи үөрэтэр-эрчийэр түмсүүтүн кэмигэр буолбут хапсыһыыга Мамедов 2:0 ахсаанынан хоппута. Ити икки бааллын кини, Рашидов көҕө суоҕун иһин иккитэ сэрэтиллибитинэн ылбыта. Ону, тренердэр Мамедов билиҥҥи туругун астыммакка, дьиҥнээхтик үлэлээн кыайбатаҕын, итэҕэтиитэ суох тустубутун иһин, хамаанда састаабыгар Рашидовы ыларга быһаардылар.

Бу иннинэ 74 кг буолбут, эмиэ Европа чемпионатыгар сүүмэрдиир хапсыһыыга Давид Баев – Магома Дибиргаджиевы (Дагестан) 9:5 ахсаанынан кыайан, састаапка киллэриллибитэ.

Онон, Европа чемпионатыгар кыттар Россия хамаандатыгар – 7 дагестанец, 2 осетин уонна 1 чечен киирдилэр.

Россия хамаандатын састааба:

57 кг Заур Угуев (Дагестан) — олимпийскай чемпион, аан дойду икки төгүллээх чемпиона.

61 кг Абасгаджи Магомедов (Дагестан) — аан дойду, Европа чемпиона.

65 кг Гаджимурад Рашидов (Дагестан) — Олимпиада призера, аан дойду чемпиона, Европа икки төгүллээх чемпиона.

70 кг Курбан Шираев (Дагестан) — Европа чемпиона.

74 кг Давид Баев (Хотугу Осетия) — аан дойду экс-чемпиона.

79 кг Халид Яхиев (Чечня) – Ярыгин Кубогын кыайыылааҕа.

86 кг Артур Найфонов (Хотугу Осетия) — Олимпиада уонна аан дойду чемпионатын призера, Европа үс төгүллээх чемпиона.

92 кг Магомед Курбанов (Дагестан) — Европа чемпиона, аан дойду чемпионатын призера.

97 кг Абдулрашид Садулаев (Дагестан) — икки төгүллээх олимпийскай чемпион, аан дойду уонна Европа 5-тии төгүллээх чемпиона.

125 кг Абдулла Курбанов (Дагестан) – Россия чемпиона.

Манна даҕатан эттэххэ, Европа быйылгы чемпионатыгар саха тустууга кыһатын иитиллээччилэриттэн, Беларусь Республикатын чиэһин көмүскүүр Арыйаан Тютрин (57 кг), Андрей Бекренев (61 кг) уонна Хотугу Македонияттан тустар Европа экс-чемпиона Владимир Егоров (57 кг) кыттыахтара.

Петр ПАВЛОВ.