Тарскай-2024: Аны уолаттар тустуохтара

Аҕыйах хонуктааҕыта, Н.Н. Тарскай кэриэһигэр улахан дьоҥҥо көҥүл тустууга республика чемпионата ыытыллан түмүктэнэн, дуораана ситэ сүтэ илигинэ аны, бүгүҥҥүттэн эмиэ Бороҕоҥҥо саҥа тутуллан үлэҕэ киллэриллибит Спорт дыбарыаһыгар 2007-2008 сс. төрөөбүт уолаттарга Николай Николаевич Тарскай бирииһигэр Саха сирин биирдиилээн уонна хамаанданан бастыыр иһин күрэхтэһиитэ саҕаланар.

Биллэрин курдук бу барыта биллиилээх спорт салайааччыта төрөөбүтэ 100 сылыгар ананан, киниэхэ сүгүрүйүү уонна ытыктабыл быһыытынан дойдутугар тэриллэр. Чопчу, бу уолаттар күрэхтэһиилэрин түмүгүнэн Дальнай Восток түһүлгэтигэр кыттар республика хамаандатын састааба сүүмэрдэниэ.

Хапсыһыылар – 42, 45, 48, 51, 55, 60, 65, 71, 80, 92, 110 кг ыытыллыахтара. Кыайыылаахтар уонна иккис-үһүс буолбуттар грамотанан, мэтээллэринэн наҕараадаланыахтара. Онтон кыайыылаах хамаандаларга кубоктар туттарыллыахтара. Маны тэҥэ «Бастыҥ бөҕөс», «Кыайыыга дьулуурун иһин» уонна «Кыраһыабай хапсыһыы иһин» диэн анал бириистэр оонньонуохтара.

Күрэхтэһии программата

Тохсунньу 10 күнэ, сэрэдэ

10:00-16:00 Мандат хамыыһыйатын үлэтэ.

16:00-17:00 Хамаанда салайааччыларын уонна судьуйалар сүбэ мунньахтара.

17:00-18:00 Бары ыйааһыннарга сэрэбиэй.

Тохсунньу 11 күнэ, чэппиэр

08:00-08:30 Кыттааччылар ыйааһыннаныылара уонна медицинскэй көрүү.

11:00-13:00 Барыллааһын хапсыһыылар.

13:00-14:00 Күнүскү аһылыкка тохтобул.

14:00-14:30 Күрэхтэһиини үөрүүлээхтик аһыы.

14:30-18:00 Салгыы хапсыһыылар.

Тохсунньу 12 күнэ, бээтинсэ

08:00-08:15 Кыттааччылар ыйааһыннаныылара, медицинскэй көрүү.

11:00-12:30 «Уоскутар» бөлөх тустуулара.

12:30-14:00 Быһаарыылаах хапсыһыылар. Кыайыылаахтары наҕараадалааһын.

«Дьулурҕан».