Ил Дархан Кубога: Кыайыылааҕынан ким буолуой?

Тохсунньу 22 – олунньу 1 күннэригэр саахымакка Саха Республикатын Ил Дарханын кубогар күрэхтэһии ыытыллар. Бу күрэхтэһии Россия эр дьоҥҥо кубогын иккис түһүмэҕин быһыытынан тэриллэр. Сүрүннээччилэринэн СР физическэй култуураҕа уонна спорка министиэристибэтэ, СР саахымакка федерацията, СР физическэй култуураҕа уонна маассабай спорка управлениета буолаллар.

Сүрүн судьуйанан – международнай арбитр, Бүтүн Россиятааҕы категориялаах судьуйа Михаил Крюков (Москва уобалаһа) үлэлиэҕэ. Күрэхтэһии син эмиэ былырыыҥҥытын курдук Саха Республикатын ойуулуур дьүһүннүүр түмэлигэр буоларынан уратылаах. Оонньуулар швейцарскай систиэмэнэн 9 туур ыытыллыахтара. Балаһыанньа быһыытынан манна үрдүк таһымнаах, күүстээх гроссмейстердар ыҥырыллан кытталлар. Ол курдук, быйылгы кубокка Алексей Придорожнай, Баира Кованова, Галина Струтинская, Дмитрий Кокарев, Дмитрий Кряквин, Антон Шомоев кытталлар.

Саха сирин саахымакка федерациятын салайааччыта Владимир Егоров иһитиннэрбитинэн, биһиги республикабытын маннык улахан күрэхтэһиигэ маастардар: Дмитрий Егоров, Гумар Моисеев, Владимир Таппыров, Роман Ганжуров, маастарга кандидаттар Максим Попов, Денис Назаров уонна эдэр кэскиллээх саахыматчыттар көмүскүүллэр.

Саха Республикатын Ил Дархана Айсен Николаев бэлиэтээбитинэн, маннык улахан таһымнаах күрэхтэһии спортсменнар оонньуур кылаастарын үрдэтиэ уонна былыргы муударай оонньууну көҕүлүө, саахыматчыттар кэккэлэрин хаҥатыа.

Кыайыылаах киһи – анал кубогынан, грамотанан, мэтээлинэн уонна харчынан бирииһинэн наҕараадаланар. Күрэхтэһии бириискэ фондата – 1 мөл. 240 тыһ. солк. тэҥнэһэр. Ол курдук, сүрүн күрэхтэһиигэ бастаабыт киһи – 250 тыһ. солк. харчынан наҕараадаланыа. Онтон дьахталлар, уолаттар, кыргыттар, бэтэрээннэр бөлөхтөрүгэр кыайбыттар – 30-туу тыһ. солк. бэлиэтэниэхтэрэ. Ону таһынан, бастыҥнарга анал бириистэр оонньонуохтара.

Күрэхтэһии чэрчитинэн саахыматы таптааччыларга анаан блиц турнир, түргэн саахымакка күрэхтэһии, судьуйаларга уонна тренердэргэ анал семинардар, гроссмейстердар маастар кылаастара тэриллиэҕэ.

Санатан эттэххэ, былырыын Ил Дархан бастакы кубогар кыайыылааҕынан аан дойдутааҕы гроссмейстер Борис Грачев (Москва) буолбута. Иккис миэстэни Володар Мурзин (Москва уобалаһа), үсүһү Михаил Кобалия (Москва) ылбыттара.

Күрэхтэһии программата

Тохсунньу 22 күнэ, бэнидиэнньик

12:00 – 20:00 Кыттааччылара кэлиилэрэ, мандат хамыыһыйатын үлэтэ.

Тохсунньу 23 күнэ, оптуорунньук

15:00 Сэрэбиэй тардыыта, судьуйалар сүбэ мунньахтара.

15:30 Күрэхтэһиини үөрүүлээхтик аһыы.

16:00 Бастакы туур.

Тохсунньу 24-30 күннэрэ

16:00 Күрэхтэһии салгыыта.

Тохсунньу 31 күнэ, сэрэдэ

14:00 9-с туур.

19:00 Күрэхтэһиини үөрүүлээхтик түмүктээһин.

Петр ПАВЛОВ.