Сонуннар

Искусство уонна спорт, хартыыналар уонна саахыматчыттар…

Саха Республикатын судаарыстыбаннай ойуулуур-дьүһүннүүр түмэлигэр саахымакка Ил Дархан Кубогар күрэхтэһии саҕаланна. Эрдэ иһитиннэрбиппит курдук, быйылгы күрэхтэһиигэ 58 саахыматчыт күөн көрсөр. Кинилэр ортолоругар алта международнай гроссмейстер баара, бу күрэхтэһии таһымын үрдэтэр.

Күрэхтэһии үөрүүлээх аһыллыыта, саха сиэринэн, алгыһынан саҕаланна. Бу тэрээһин үрдүк тэрээһиннээхтик ыытыллан – үтүө, кэрэ, сырдык эрэ өйдөбүллээх буоларыгар баҕарабыт.

Ил Дархан Кубогын үөрүүлээх аһыллыытыгар РФ Государственнай Думатын депутата, аан дойду саахымакка хас да төгүллээх чемпиона Анатолий Карпов классическай саахымакка Россия Кубогын иккис түһүмэҕин тэрийээччилэригэр уонна кыттааччыларыгар анаан ыыппыт эҕэрдэтэ ааҕан иһитиннэрилиннэ.

Бу бэлиэ күҥҥэ Ойуулуур-дьүһүннүүр судаарыстыбаннай түмэл үрдүнэн аатырбыт хомусчут Альбина Дегтярева толоруутугар хомус дьүрүскэн тыаһа дьүрүһүйдэ.

Дьэ, ол кэнниттэн болдьоммут бириэмэҕэ кылаабынай судьуйа хамаандатынан оонньооччулар сэрэбиэй быһыытынан утарыта олорон оонньоон киирэн бардылар. Искусство уонна спорт, народнай худуоһунньуктар уруһуйдара уонна саахыматчыттар дьүөрэлэһиилэрэ. Бэркэ толкуйдаммыт дьаһал!

Манна сылдьан мин, 1960 сыллаахха Римнээҕи Олимпиадаҕа тустуу былыргы гладиатордар киирсибит Колизейдарыгар ыытыллыбытын санаан кэллим. Бу, маннык тэрээһини дьаһайан ыытар дойду бэйэтин историятын, култууратын, абыычайын көрдөрүүтэ, билиһиннэриитэ буолар.

Бүгүн, программа быһыытынан Кубокка бастакы туур ыытылынна. Аны олунньу 1 күнүгэр диэри хас күн аайы 16:00 чаастан туурдар ыытыллыахтара. Барыта 9 туур оонньонор. Кыайыылаахтары тохсунньу 31 күнүгэр билиэхпит.

Күрэхтэһии хаамыытын биһиги dzulurgan.ru сайтпытыттан кэтээн көрө-билэ сылдьаргытыгар ыҥырабыт.

Петр ПАВЛОВ.

Ааптар хаартыскаҕа түһэриитэ.

 

Добавить комментарий

Ваш адрес email не будет опубликован. Обязательные поля помечены *

137681
Бүгүн : 145