Кубокка 58 киһи Россия 12 регионуттан кыттар

Бүгүҥҥүттэн Ил Дархан Кубогар саахымыкка күрэхтэһии саҕаланна. Бастаан Бэчээт дьиэтигэр үгэһинэн суруналыыстары кытта көрсүһүү тэрилиннэ.

Көрсүһүүгэ Саха Республикатын физическэй култуураҕа уонна спорка министрэ Леонид Спиридонов, СР саахымакка федерациятын президенэ Владимир Егоров, күрэхтэһии кылаабынай судьуйата Михаил Крюков, гроссмейстер Дмитрий Кряквин кыттыыны ыллылар. Кинилэр, Саха сирин Аҕа баһылыга спорду, чуолаан саахыматы өйүүрүгэр, элбэх үлэни ыытарыгар махтаннылар. Маннык улахан таһымнаах күрэхтэһии иккис сылын ыытылларын эттилэр. Итиэннэ күрэхтэһии сайдан, кэҥээн иһэрин санаттылар. Ол курдук, быйылгы Кубокка 58 киһи Россия 12 регионуттан кыттарын санаттылар. Кинилэр ортолоругар алта международнай гроссмейстер күрэс былдьаһар. Оонньуу олунньуга диэри тоҕус күн устата ыытыллыа. Эрдэ иһитиннэрбиппит курдук, бу күрэхтэһии Россия саахымакка Кубогын иккис түһүмэҕин быһыытынан көрүллэр.

Кырдьык, спорт бу муударай, өйү үлэлэтэр, сайыннарар көрүҥэр маннык күрэхтэһии ыытыллыыта, саахымат салгыы сайдыытыгар төһүү күүс буолара мэлдьэһиллибэт.

Көрсүһүү кэмигэр суруналыыстарга, Кубок кыайыылаахтарын мэтээллэрэ көрдөрүлүннүлэр. Мэтээллэр кырдьык сиэдэрэйдэр, сахалыы көстүүлээхтэр. Маны «Киэргэ» тэрилтэ маастардара анал сакааһынан оҥорбуттар. Онтон кубоктары «Көмүлүөк» тэрилтэ оҥорбут. Көрсүһүү кыттыылаахтара Ил Дархан Кубога үгэскэ кубулуйан, сыл аайы ыытылларыгар баҕардылар.

Быйылгы күрэхтэһии саамай улахан рейтиннээх оонньооччулара кимнээҕий диэн ыйытыыга Михаил Крюков: «Элбэх улахан таһымнаах күрэхтэһиилэр кыайыылаахтара Дмитрий Кокорев, Алексей Гребнев, Алексей Придорожнай рейтиннэрэ үрдүк. Ол эрэн, күрэхтэһии аата күрэхтэһии, сүрүн миэстэлэри кинилэр ылыахтара диэн эрдэттэн этэр күчүмэҕэй. Туох баҕарар буолуон сөп. Эдэрдэр даҕаны күүстээхтэр», – диэн хоруйдаата.

Итини тэҥэ, тэрийээччилэр бу күрэхтэһиинэн сибээстээн өссө үс гроссмейстер сеанс биэрэллэрэ билиннэ. Сеанс республикатааҕы Саахымат, дуобат киинигэр ыытыллара былааннанар. Ону таһынан гроссмейстердар маастар-кылаастара тэриллиэҕэ диэн эттилэр. Уонна блиц турнир, түргэн саахымакка дьоҕус күрэхтэһиилэр ыытыллыахтара.

Балаһыанньа быһыытынан сэттэ бастыҥ көрдөрүүлээхтэр анал очукуо аахсан, Россия кубогын салгыы түһүмэҕэр кыттар быраабы ылыахтара. Дьэ, ол кимнээх буолалларын сотору билиэхпит.

Күрэхтэһии хаамыытын биһиги dzulurgan.ru сайтпытыгар күннэтэ кэтээн көрөргүтүгэр ыҥырабыт.

Петр ПАВЛОВ.

Ааптар хаартыскаҕа түһэриилэрэ.