Россия кубогар үһүс буоллулар

Орел куоракка ох саанан блочнай ытыыга Россия кубогын күрэхтэһиитин финалистары быһаарар күнүгэр, Саха сирин дьахталларга хамаандата: Дайаана Винокурова (Кэбээйи), Людмила Прибылых (Мэҥэ Хаҥалас) уонна Юлия Маркова (Хаҥалас) үһүс миэстэни былдьаһыыга Москва уобалаһын бастыҥ ытааччыларын кытта эрбии биитинии эристилэр. Хамаандаҕа Покровскайтан Саха Өрөспүүбүлүкэтин үтүөлээх тренерэ Михаил Алексеев иитиллээччитэ Юлия Маркова баар. Кинилэр хамаанданан боруонса мэтээли ылары ситистилэр.

Бу иннинэ тохсунньу 14-18 күннэригэр Россия чемпионатыгар хамаанданан иккис буолан, үрүҥ көмүс мэтээлинэн наҕараадаламмыттара. Юлия улахан спорка бигэтик киирэн үрдүк көрдөрүүлэри ситиһэ сылдьар. Манна дьоһуннаах ох сааны ыларыгар Хаҥалас улууһун спорка уонна физическэй культураҕа урукку салайааччытын Юрий Никифоров үтүөтүн, өйөбүлүн санаан ааһар тоҕоостоох.

Уйбаан УЙГУУРАП.